Ndotja e ajrit, zhurmat dhe ekspozimi ndaj kimikateve toksike lidhen me një rrezik më të lartë për probleme të shëndetit mendor. Paralajmërimi vjen nga Agjencia Europiane e Mjedisit, e cila kërkon masa urgjente për uljen e ndotjes.
Sipas agjencisë, edhe ulje të vogla të ndotjes mund të sjellin përmirësime të rëndësishme në shëndetin mendor të popullsisë.
Ekspertët theksojnë se shëndeti mendor ndikohet nga shumë faktorë, si gjenetika, kushtet sociale dhe ekonomike, si dhe mënyra e jetesës. Megjithatë, ndotja po konsiderohet gjithnjë e më shumë si një faktor që mund të nxisë ose të përkeqësojë probleme si depresioni, ankthi apo çrregullime të tjera psikike.
Sipas raportit, ndotja e ajrit ka ndikim të drejtpërdrejtë në tru, sidomos kur ekspozimi ndodh gjatë shtatzënisë, në fëmijëri dhe në adoleshencën e hershme. Studimet tregojnë se ekspozimi afatgjatë ndaj ajrit të ndotur lidhet me rritjen e rasteve të depresionit.
Agjencia thekson se lidhja është veçanërisht e fortë për grimcat shumë të imta të ndotjes, të njohura si PM2.5, si dhe për dioksidin e azotit. Në periudhat kur ndotja e ajrit rritet ndjeshëm, janë vërejtur edhe më shumë raste depresioni dhe përkeqësim i simptomave të sëmundjeve si skizofrenia.
Raporti ndalet edhe te zhurma e mjedisit, sidomos ajo që vjen nga trafiku rrugor, trenat dhe avionët. Ekspozimi i vazhdueshëm ndaj zhurmës aktivizon reagimin e stresit në organizëm dhe mund të ndikojë negativisht në shëndetin mendor.
Studimet tregojnë se çdo rritje prej 10 decibelësh në nivelin e zhurmës lidhet me një rritje të vogël, por të matshme të rrezikut për depresion dhe ankth. Zhurma e avionëve rezulton të ketë ndikimin më të madh në raport me nivelet e saj, duke rritur ndjeshëm rrezikun për depresion.
Agjencia Europiane e Mjedisit thekson gjithashtu se ekspozimi ndaj disa kimikateve, edhe në sasi të vogla, mund të ketë pasoja për shëndetin mendor. Studimet kanë lidhur metalet e rënda si plumbi, tymosjen pasive, pesticidet dhe disa kimikate që ndikojnë në sistemin hormonal me rritjen e rrezikut për depresion, ankth dhe skizofreni.
Sipas raportit, ekspozimi ndaj këtyre substancave gjatë shtatzënisë ose në fëmijëri mund të ketë pasoja afatgjata për zhvillimin e trurit dhe shëndetin mendor. /euronews.com
