Konflikti në Lindjen e Mesme po reflekton me shpejtësi në tregun shqiptar. Këtë të premte, çmimi I naftës ka pësuar sërish rritje. Në shumicën e pikave të karburanteve ajo shitet me çmimin 182 lekë/litër.
Megjithatë, ka edhe disa pika karburantesh me çmime më të larta, duke shkuar në 185, deri në 189 lekë për litër.
Operatorët e tregut e lidhin luhatjen e çmimeve me zhvillimet në tregjet ndërkombëtare të energjisë, ku çmimet e naftës së papërpunuar kanë shfaqur rritje për shkak të tensioneve gjeopolitike dhe pasigurive në furnizim. Shoqata e hidrokarbureve e ka paralajmëruar prej disa ditësh një rritje çmimi maksimale deri në 40 lekë, ndërsa Autoriteti i Konkurrencës ka nisur monitorimin e tregut të karburanteve, duke vendosur nën vëzhgim të gjitha kompanitë që ushtrojnë aktivitet në tregtimin me shumicë dhe me pakicë të benzinës dhe naftës. Vëmendja kryesore e këtij procesi do të përqendrohet tek ecuria e çmimeve në pikat e shitjes me pakicë,
Shqipëria është një vend I varur ndaj importit të hidrokarbureve, ndaj çdo ndryshim në tregjet globale reflektohet relativisht shpejt në çmimin final që paguajnë konsumatorët.
Megjithatë, nafta është hallka e parë e zinxhirit të konsumit. Çdo rritje e çmimit të saj përkthehet në kosto më të larta transporti dhe prodhimi, duke ushtruar presion për rritjen e çmimeve edhe te produktet e tjera të konsumit të përditshëm. /Scan
