Një investigim i përbashkët mes gazetarëve të emisionit Piranjat dhe ekipit italian të emisionit investigativ “Le Iene” ka zbuluar një rrjet të gjerë call centerash mashtrues që operojnë në disa zona të Tiranës, duke synuar shtetas europianë përmes skemave të rreme investimi.
Operacioni investigativ nisi në nëntor të vitit të kaluar, kur një i ri italian u infiltrua në një prej grupeve që vepronin në një kullë luksoze në qendër të kryeqytetit. Pas disa muajsh dokumentimi me kamera të fshehta dhe dëshmi të brendshme, ndërhyrja e SPAK çoi në mbylljen e një call centeri dhe arrestimin e tetë personave, të dyshuar për përfshirje në mashtrim ndërkombëtar.
Megjithatë, investigimi tregon se aktiviteti i këtyre strukturave nuk është ndalur. Sipas një harte të siguruar nga një ish-punonjës i këtyre call centerave, aktiviteti mashtrues është i shpërndarë në disa zona të Tiranës, përfshirë Kompleksin Delijorgji, zonën e Farmacisë 10, kompleksin Halili në Rrugën e Dibrës dhe ndërtesa në zonën e Bllokut.
Gazetarët vizituan një sërë adresash të identifikuara në hartë, por në shumë prej rasteve gjetën vetëm ambiente të boshatisura ose dyer të mbyllura, çka sipas tyre tregon se aktivitetet zhvendosen vazhdimisht për të shmangur kontrollin e autoriteteve.
Në një rast tjetër, investigimi identifikoi një ambient të ri në Rrugën e Kavajës, pranë kompleksit Delijorgji, ku sipas dëshmive të një ish-punonjëseje ishte hapur një call center i ri. Kamera e gazetarëve regjistroi hyrjen e operatorëve dhe konsulentëve të punësuar në këtë strukturë, ndërsa policia u njoftua për ndërhyrje.
Megjithatë, sipas ekipit investigativ, ndërhyrja e policisë nuk u realizua në momentin e parë, duke i dhënë kohë operatorëve të largoheshin nga ambientet.
Investigimi zbulon gjithashtu se një call center i mbyllur më parë nga SPAK në Kullën e Gjelbër është rihapur në një tjetër ambient në Ring Center, në zonën e Zogut të Zi. Sipas të dhënave të mbledhura gjatë investigimit, infrastruktura e sekuestruar në një nga këto ambiente përfshinte tavolina pune, kompjutera, monitorë dhe pajisje të tjera për rreth 500 operatorë, me një vlerë që kalon 1 milion euro.
Ambientet ku zhvillohet aktiviteti janë shpesh të blinduara, me hyrje të kontrolluar me karta dhe me roje sigurie që monitorojnë çdo lëvizje pranë tyre.
Sipas materialeve të dokumentuara nga investigimi, rrjeti i call centerave mashtrues në Tiranë nuk përbëhet nga raste sporadike, por nga një strukturë e shpërndarë në disa pika të kryeqytetit, e cila synon shtetas të huaj përmes telefonatave dhe platformave të rreme investimi.
Gazetarët theksojnë se aktiviteti gjeneron qindra milionë euro në muaj nga mashtrimet ndaj qytetarëve europianë, ndërsa grupet kriminale zhvendosin vazhdimisht vendndodhjen për të shmangur hetimet.
Investigimi vijon, ndërsa pritet që autoritetet shqiptare të verifikojnë edhe adresat e tjera të identifikuara në hartën e call centerave që operojnë në kryeqytet.
