Ish-zv.drejtoresha e Agjencisë Kombëtare të Shoqërisë së Informacionit, Hava Delibashi, ka paraqitur kërkesë për zëvendësimin e masës “arrest në shtëpi”, nën të cilën ndodhet aktualisht.
Delibashi është pjesë e të njëjtës dosje hetimore ku përfshihen edhe Ergys Agasi dhe Ermal Beqiri, të shpallur në kërkim në kuadër të operacionit të SPAK që goditi një grup të dyshuar kriminal që koordinonte tenderët e AKSHI-t.
Masa e arrestit në shtëpi ndaj saj dhe ish-drejtoreshës Mirlinda Karçanaj u vendos nga Gjykata e Posaçme kundër Korrupsionit dhe Krimit të Organizuar më 18 dhjetor 2025.
Këto masa u morën pasi SPAK kërkoi ndalimin e zyrtarëve të përfshirë në atë që konsiderohet si një nga skandalet më të mëdha të tenderave në sektorin e teknologjisë dhe shërbimeve publike.
Hetimi lidhet me dyshimet për abuzime me fondet publike dhe manipulim të procedurave të prokurimit brenda AKSHI-t.
Kërkesa e Delibashit për ndryshim mase pritet të shqyrtohet nga Gjykata e Posaçme, ndërsa hetimet për dosjen vijojnë.
