Ish-presidenti i Shteteve të Bashkuara, Donald Trump, ka paralajmëruar se NATO mund të përballet me një “të ardhme shumë të keqe” nëse vendet aleate nuk mbështesin SHBA në përpjekjet për hapjen e Ngushticës së Hormuzit dhe përballjen me Iranin.
Deklarata u bë gjatë një interviste për Financial Times, ku Trump dërgoi një mesazh të drejtpërdrejtë për vendet europiane që janë pjesë e aleancës ushtarake.
Sipas tij, aleatët duhet të tregojnë mbështetje për Shtetet e Bashkuara në të njëjtën mënyrë siç SHBA ka mbështetur Europën në konflikte të tjera.
“Kemi qenë shumë të sjellshëm. Nuk ishte e nevojshme t’i ndihmonim me Ukrainën. Ukraina është mijëra milje larg nesh, por ne i ndihmuam. Tani do të shohim nëse ata do të na ndihmojnë ne”, deklaroi Trump.
Komentet e tij vijnë në një moment tensioni të lartë në Lindjen e Mesme, ku përplasjet mes SHBA dhe Iranit kanë rritur shqetësimet për sigurinë e transportit detar në Ngushticën e Hormuzit, një nga korridoret më të rëndësishme për tregtinë globale të naftës.
Paralajmërimi i Trump ndaj NATO-s pritet të shtojë debatet mes aleatëve për rolin dhe përgjegjësitë e përbashkëta të sigurisë në rast të përshkallëzimit të konfliktit me Iranin. /skyweb.al
