Vetëm 47% e llogarive bankare në Shqipëri aksesohen edhe përmes internetit nga aplikacionet ose faqet online të bankave. Pavarësisht se shumë shqiptarë po kryejnë veprime bankare nga telefoni në rehatinë e shtëpisë apo punës së tyre, sërish numri i llogarive që vijojnë të aksesohen vetëm me praninë fizike të personit në bankë, mbizotëron ndaj atyre që kontrollohen nga telefoni.
E thënë ndryshe, rreth 53% e llogarive bankare të shqiptarëve nuk aksesohen fare nga interneti, që nënkupton se shumë qytetarë vijojnë të mos heqin dorë nga mënyra tradicionale e kryerjes së transaksioneve dhe marrjes së shërbimeve të tjera nga sportelet fizike të bankave.
Në momentin e hapjes së një llogarie, të gjitha bankat i sugjerojnë klientit që të shkarkojnë aplikacionin e tyre, i cili do t’i ofrojë mundësinë e kontrollit të balancës së llogarisë, të shikojë urdhërpagesat periodike, gjendjen e kartave të debitit dhe kreditit, kreditë konsumatore dhe ato për shtëpi (pra mbetjet që duhen paguar, datat e pagesave, shuma e kësteve), detajet e depozitës me afat ose hapja e një depozite të re, pagesën e kartës së kreditit apo shlyerjen e kësteve të kredisë, transferta midis llogarive personale, transferta në çdo llogari, në çdo bankë brenda dhe jashtë Shqipërisë, pagesat e faturave të telefonit, OSHEE dhe UKT.
Bankingu në shtëpi mundëson kryerjen e transaksioneve të shpejta kudo dhe pa humbur kohë. Shifrat tregojnë se një numër i konsiderueshëm personash nuk i marrin parasysh këto përfitime, janë mosbesues dhe jo të gatshëm të përqafojnë digjitalizimin e shërbimeve bankare. Megjithatë, nga 1.3 milionë që ishte totali i llogarive të aksesueshme në internet gjatë 2024, ky numër rezulon të ketë arritur në 1.9 milionë gjatë 2025, rreth 44% më shumë.
Sipas të dhënave më të fundit nga Banka e Shqipërisë, nga totali i llogarive të aksesueshme në internet, 98% mbahen prej shqiptarëve dhe vetëm 2% prej shtetasve të huaj. Ndërkohë, në llogaritë që akesohen nga telefoni prej shqiptarëve, rreth 90% janë nga individë dhe vetëm 10% nga biznese.
Në një kohë kur bankingu online po nxitet nga shumë shtete, me synim zvogëlimin e përdorimit të parasë fizike, duket se një pjesë e konsiderueshme e qytetarëve në Shqipëri do të vijojnë të preferojnë kontaktin fizik me bankën edhe për pak kohë. /tvscan
