Ministria e Financave ka publikuar treguesit paraprakë fiskalë për periudhën janar–qershor 2026, ku të ardhurat totale arritën në 410.6 miliardë lekë, ndërsa shpenzimet publike në 357.8 miliardë lekë.
Sipas të dhënave zyrtare, të ardhurat u realizuan në masën 105% të planit të periudhës dhe ishin 44.5 miliardë lekë, ose 12.2%, më të larta krahasuar me gjashtëmujorin e parë të vitit 2025. Deri në fund të qershorit ishte realizuar 49.9% e planit vjetor të të ardhurave.
Të ardhurat e mbledhura nga administratat tatimore dhe doganore arritën në 260.1 miliardë lekë, rreth 4.4 miliardë lekë mbi planin e periudhës dhe 17.8 miliardë lekë më shumë se një vit më parë.
Administrata tatimore mblodhi 141.5 miliardë lekë nga TVSH-ja neto në vend, tatimi mbi fitimin, tatimi mbi të ardhurat personale dhe taksat kombëtare. Kjo shumë ishte 10% më e lartë se në gjashtëmujorin e vitit 2025 dhe 4.6% mbi plan.
Të ardhurat nga TVSH-ja neto në vend arritën në 41.6 miliardë lekë, duke u rritur me 25.4% në krahasim me një vit më parë dhe duke tejkaluar planin me 17.9%. Gjatë kësaj periudhe u dhanë 7.9 miliardë lekë rimbursime.
Nga tatimi mbi fitimin u mblodhën 31.1 miliardë lekë, ose 85.2% e planit të gjashtëmujorit. Ndërsa të ardhurat nga tatimi mbi të ardhurat personale arritën në 47.6 miliardë lekë, 16.6% më shumë se një vit më parë dhe 15.4% mbi plan.
Të ardhurat nga taksat kombëtare arritën në 21.3 miliardë lekë, me realizim 95.6% të planit. Ndërkohë, të ardhurat nga sigurimet shoqërore dhe shëndetësore u ngjitën në 99.2 miliardë lekë, 13.3% më shumë se në të njëjtën periudhë të vitit 2025 dhe 2.8% mbi plan.
Administrata doganore mblodhi 118.6 miliardë lekë, ose 4.3% më shumë se një vit më parë, por realizoi 98.5% të planit të periudhës.
Të ardhurat nga TVSH-ja në import arritën në 79.1 miliardë lekë, ndërsa nga akciza u mblodhën 33.6 miliardë lekë. Të dy zërat shënuan rritje vjetore, por mbetën lehtësisht nën plan.
Nga renta minerare në eksport u mblodhën 923 milionë lekë, ose 84.8% e planit. Taksat doganore sollën 5 miliardë lekë të ardhura, 10.3% më shumë se në gjashtëmujorin e parë të vitit të kaluar.
Në krahun e shpenzimeve, qeveria realizoi 357.8 miliardë lekë, ose 97.4% të planit të periudhës. Krahasuar me një vit më parë, shpenzimet publike u rritën me 24.8 miliardë lekë, ose 7.5%.
Shpenzimet kapitale arritën në 36.8 miliardë lekë, duke tejkaluar me 3.8% fondet e planifikuara për gjashtëmujorin. Krahasuar me të njëjtën periudhë të vitit 2025, investimet u rritën me 3.4 miliardë lekë, ose 10.2%.
Shpenzimet korente arritën në 321.1 miliardë lekë, me realizim 97.4% të planit dhe rritje vjetore prej 21.4 miliardë lekësh, ose 7.2%.
