Një dëgjesë publike e organizuar nga Këshilli Bashkiak i Bulqizës në fshatin Gjoricë e Poshtme është shoqëruar me tensione të forta, ku në qendër të debatit ka qenë kundërshtimi i banorëve ndaj dhënies me ankand të sipërfaqeve pyjore dhe kullosore.
Takimi, që synonte informimin për parcelat që pritet të jepen për përdorim ekonomik, u kthye në një përplasje të drejtpërdrejtë mes komunitetit dhe përfaqësuesve të Bashkisë.
Banorët ngritën shqetësimin se këto toka përdoren prej vitesh si kullota dhe janë jetike për mbajtjen e bagëtive.
Gjatë prezantimit, përfaqësuesit e Drejtorisë së Pyjeve dhe Kullotave nuk specifikuan qartë zonat që do të jepen në ankand, çka shtoi dyshimet dhe acaroi më tej situatën.
Përfaqësuesit e Bashkisë u mbrojtën me argumentin se toka është pronë e institucionit dhe mund të përdoret për projekte të ndryshme ekonomike.
Por për banorët, problemi është më i thellë.
“Po na merren kullotat, nuk kemi ku të mbajmë bagëtinë”, ishte një nga reagimet më të forta gjatë dëgjesës, siç raporton Bulqizaime.com.
Sipas tyre, dhënia e vazhdueshme e tokave për projekte, kryesisht energjetike, po redukton ndjeshëm hapësirat për blegtori, duke goditur drejtpërdrejt burimin kryesor të të ardhurave për shumë familje.
Ata paralajmërojnë se nëse ky trend vijon, zona rrezikon të boshatiset nga aktiviteti tradicional dhe të humbasë funksionin ekonomik rural.
Banorët theksojnë se nuk janë kundër investimeve, por kundërshtojnë mënyrën se si po realizohen, duke pretenduar se procesi i dëgjesave është formal dhe pa ndikim real në vendimmarrje.
Sipas tyre, në disa raste ka pasur edhe presion për të dhënë dakordësi, ndërsa dyshojnë se fituesit e ankandeve janë të paracaktuar.
Brenda pak javësh, Bashkia Bulqizë ka dhënë me ankand mbi 100 hektarë tokë për projekte energjetike, ndërsa në plan janë edhe sipërfaqe të tjera.
Kjo po shihet nga banorët si një përhapje e pakontrolluar e projekteve që po “gërryen” kullotat dhe hapësirat e përbashkëta.
Nga ana tjetër, një pjesë e banorëve mbështetën iniciativën, duke argumentuar se investimet sjellin zhvillim dhe të ardhura për zonën, ndërsa theksuan se Bashkia ka të drejtë të vendosë për përdorimin e pronës së saj.
Megjithatë, përplasja në Gjoricë e Poshtme nxori në pah një konflikt të qartë mes zhvillimit të projekteve dhe mbijetesës së ekonomisë lokale, ku blegtoria mbetet ende shtylla kryesore e jetesës për komunitetin.
