Shqipëria po hyn në një fazë të re në menaxhimin e transportit të mallrave, duke kaluar nga dokumentet fizike drejt një sistemi të plotë elektronik, që synon të ndryshojë mënyrën si bizneset dhe autoritetet ndërveprojnë në këtë sektor.
Projektligji i ri, i hedhur për konsultim, parashikon që dokumentacioni i transportit të mallrave të paraqitet dhe të administrohet në formë elektronike përmes platformave të certifikuara, ndërsa autoritetet shtetërore do të jenë të detyruara ta pranojnë këtë format.
Ndryshimi shënon fundin gradual të dokumenteve në letër dhe kalimin drejt një sistemi të unifikuar digjital.
Sistemi i ri nuk kufizohet vetëm te paraqitja e dokumenteve, por krijon një mekanizëm të plotë kontrolli dhe gjurmueshmërie.
Çdo veprim mbi informacionin e transportit do të regjistrohet në mënyrë elektronike, duke krijuar një histori të plotë të të dhënave dhe duke rritur transparencën dhe mundësinë për auditim.
Një element kyç i projektligjit është krijimi i platformave dhe ofruesve të certifikuar, të cilët do të menaxhojnë shkëmbimin e informacionit. Këto platforma do të funksionojnë sipas standardeve të përcaktuara dhe do të jenë të vetmet të autorizuara për transmetimin e të dhënave të transportit, duke hapur njëkohësisht një treg të ri shërbimesh digjitale në këtë sektor.
Ligji parashikon gjithashtu që edhe dokumentet shoqëruese, si certifikatat apo vulat zyrtare, të lëshohen në formë elektronike, duke e shtrirë digjitalizimin në të gjithë zinxhirin e transportit të mallrave.
Në të njëjtën kohë, projektligji e lidh drejtpërdrejt sistemin shqiptar me Bashkimin Europian. Autoritetet do të kenë detyrimin të raportojnë te Komisioni Europian për zbatimin dhe përdorimin e këtij sistemi, duke e bërë atë pjesë të kuadrit europian të shkëmbimit të informacionit për transportin.
Megjithëse në fazën fillestare përdorimi i dokumentacionit elektronik do të jetë një mundësi për bizneset, ligji hap rrugën që në të ardhmen ai të bëhet detyrim i plotë, duke e zhvendosur të gjithë procesin në mënyrë ekskluzive online.
Ky transformim synon të ulë burokracinë, të përshpejtojë procedurat dhe të rrisë kontrollin mbi transportin e mallrave, duke e afruar Shqipërinë me standardet europiane të digjitalizimit në logjistikë. /skyweb.al
