Linjat ajrore globale po përjetojnë një rritje rekord të shitjeve të biletave, pasi pasagjerët po rezervojnë gjithnjë e më herët nga frika e rritjes së çmimeve. Kjo prirje lidhet me një shqetësim të madh: lufta në Lindjen e Mesme mund të tronditë të gjithë sistemin e udhëtimit ajror global, duke sjellë humbje të konsiderueshme që pritet të rëndojnë kryesisht mbi udhëtarët. Në një afat të shkurtër, çmimet e biletave mund të rriten deri në 10%.
Sipas vlerësimeve të Financial Times, 20 linjat ajrore më të mëdha në botë kanë humbur rreth 53 miliardë dollarë në vlerë që nga nisja e konfliktit në Iran. Industria e aviacionit po përballet me krizën më të rëndë që prej pandemisë Covid-19, me ndërprerje të ngjashme si anulime fluturimesh dhe mbyllje aeroportesh kyçe. Situata rëndohet edhe më shumë nga rritja e ndjeshme e çmimit të karburantit, i cili është dyfishuar që nga fillimi i konfliktit.
Të parat që po ndjejnë pasojat janë linjat ajrore me kosto të ulët. Wizz Air, e cila kishte planifikuar zgjerim përpara konfliktit, u përball me presion të madh në treg, pasi paralajmëroi se lufta në Iran mund t’i zhdukë fitimet për këtë vit. Ndërkohë, kompanitë e mëdha amerikane si Delta, United dhe American Airlines po përgatiten për skenarë ku çmimi i naftës mund të arrijë deri në 170 dollarë për fuçi.
Nga ana tjetër, disa linja ajrore evropiane mund të përfitojnë pjesërisht nga situata. Mbyllja e nyjeve të rëndësishme në Lindjen e Mesme pritet të ridrejtojë trafikun ajror nga Azia drejt Evropës, duke rritur rolin e aeroporteve evropiane si pika kryesore tranziti.
