Arti tradicional i “ojnave”, një teknikë e hollë thurjeje me grep dhe gjilpërë, është nominuar për t’u përfshirë në Listën Përfaqësuese të Trashëgimisë Kulturore Jomateriale të Njerëzimit në UNESCO.
Lajmin e bëri të ditur ministri Blendi Gonxhja, duke theksuar se nominimi është realizuar përmes një dosjeje të përbashkët mes Shqipëria, Rumania dhe Turqia.
“Ojnat, arti i rafinuar i thurjes me grep dhe gjilpërë në traditën shqiptare, janë nominuar në një dosje të përbashkët me Rumaninë dhe Turqinë për përfshirje në Listën Përfaqësuese të Trashëgimisë Kulturore Jomateriale të Njerëzimit në UNESCO. Një trashëgimi e çmuar, e ruajtur dhe përcjellë ndër breza nga gratë shqiptare, vijon të jetojë sot përmes mjeshtërisë së artizaneve, duke ndërthurur traditën me frymën bashkëkohore dhe duke përfaqësuar kulturën shqiptare në arenën ndërkombëtare”, shkroi ministri.
“Ojnat” përfaqësojnë një nga format më të rafinuara të artizanatit shqiptar, të trashëguar ndër breza nga gratë, të cilat kanë ruajtur dhe zhvilluar këtë teknikë me përkushtim. Ky art i veçantë jo vetëm që pasqyron identitetin kulturor, por edhe dëshmon për mjeshtërinë dhe kreativitetin e komuniteteve lokale.
Nëse pranohet, përfshirja në listën e UNESCO do të përbënte një hap të rëndësishëm për promovimin ndërkombëtar të kulturës shqiptare dhe mbrojtjen e kësaj trashëgimie të rrallë. /skywen.al
