Një rregull i ri i miratuar nga ENAC (Enti Kombëtar për Aviacionin Civil Italian) dhe i autorizuar nga Ministria e Brendshme, po ndryshon ndjeshëm mënyrën e udhëtimit ajror në Itali.
Që prej kësaj jave, pasagjerët nuk janë më të detyruar të tregojnë një dokument identiteti në portën e imbarkimit për fluturimet kombëtare dhe ato drejt vendeve të zonës Schengen. Mjafton vetëm karta e imbarkimit (boarding pass).
Vendimi tashmë ka hyrë në fuqi dhe po zbatohet në të gjitha aeroportet italiane.
Sipas dokumentit zyrtar të siguruar nga Corriere della Sera, bëhet fjalë për një ndryshim në programin kombëtar të sigurisë së aviacionit civil.
Deri më tani, linjat ajrore ishin të detyruara të verifikonin përputhjen e emrit në kartën e imbarkimit me një dokument identiteti përmes kontrollit vizual.
Kjo procedurë tani është hequr.
ENAC sqaron se siguria nuk komprometohet, pasi kontrolli i pasagjerëve në zonën sterile të aeroportit, përmes detektorëve të metaleve dhe pajisjeve të skanimit, vazhdon të garantojë standardet e nevojshme sipas rregullores së Bashkimit Evropian.
Vendimi është në përputhje me praktikat e ndjekura tashmë nga vende si Gjermania, dhe vlen për të gjitha destinacionet brenda Italisë dhe në vendet e zonës Schengen, ku përfshihen 25 nga 27 shtetet anëtare të BE-së si dhe Islanda, Norvegjia, Lihtenshtajni dhe Zvicra.
Megjithatë, për disa destinacione të konsideruara “të ndjeshme” për çështje migracioni, kontrolli i dokumenteve do të vazhdojë të jetë i detyrueshëm.
Për shembull, udhëtarët drejt Irlandës duhet të paraqesin ende një dokument identiteti, ndërsa Qipro është ende në proces të plotë të heqjes së barrierave doganore.
Ky ndryshim pritet të shkurtojë kohën e imbarkimit dhe të lehtësojë procesin e udhëtimit, pa cënuar sigurinë e pasagjerëve. /Leonard Berberi-Corriere.al
