Vetëm dy muaj para hyrjes në fuqi të sistemit SEPA në Shqipëri, Banka e Shqipërisë ka përcaktuar zyrtarisht kufijtë maksimalë të tarifave që do të aplikohen për çdo transaksion nëpërmjet këtij mekanizmi.
Sipas projekt-rregullores së publikuar nga autoriteti qendror bankar, asnjë pagesë hyrëse në Shqipëri përmes SEPA nuk do të kushtojë më shumë se 3 euro.
Kjo do të thotë se një emigrant shqiptar që i dërgon para familjes në Shqipëri, nuk do të përballet me tarifa më të larta për transfertën, pavarësisht shumës. Rregullorja parashikon që kjo tarifë maksimale të vlejë për çdo transfertë hyrëse, duke reduktuar ndjeshëm kostot e deritanishme të shërbimeve bankare ndërkufitare.
Për pagesat dalëse, pra ato që nisen nga Shqipëria drejt vendeve të tjera anëtare të skemës SEPA, Banka e Shqipërisë ka vendosur që tarifat nuk duhet të jenë më të larta se ato që aplikohen aktualisht për pagesat kombëtare në euro përmes sistemit AIPS. Për shembull, në sistemin AIPS EURO, komisioni minimal që aplikojnë bankat është 4 euro, dhe e njëjta logjikë do të vlejë edhe për transfertat dalëse përmes SEPA.
Në rastet kur vlera e transfertës është më e vogël ose e barabartë me 150 mijë euro, bankat nuk do të mund të aplikojnë tarifë më të lartë se 0.02% e shumës së transferuar.
Gjithashtu, kur llogaria e dërguesit dhe ajo e përfituesit janë në monedha të ndryshme (p.sh., nga lekë në euro), sistemi do të përfshijë automatikisht këmbimin valutor, dhe për këtë do të aplikohet një tarifë shtesë sipas kursit të këmbimit të ditës dhe politikave të bankës përkatëse.
Skema SEPA (Single Euro Payments Area) do të jetë funksionale në Shqipëri që nga 7 tetori 2025, duke u dhënë mundësi qytetarëve dhe bizneseve shqiptare të kryejnë pagesa të shpejta, të sigurta dhe me kosto të ulët në euro me vendet anëtare të skemës.
Sipas vlerësimeve të Bankës së Shqipërisë, përfitimet ekonomike janë të konsiderueshme. Vetëm në vitin e parë, ekonomia shqiptare pritet të kursejë të paktën 20 milionë euro, ndërsa kjo shifër pritet të rritet në vitet në vijim falë efikasitetit dhe kostove të reduktuara që ofron SEPA.
Përfshirja e Shqipërisë në këtë skemë shënon një hap të rëndësishëm drejt integrimit financiar dhe afron vendin me standardet e Bashkimit Evropian në fushën e pagesave elektronike./skyweb.al
