Dhoma Amerikane e Tregtisë ka ngritur një sërë shqetësimesh serioze që po kërcënojnë zhvillimin e turizmit në Shqipëri, në kulmin e sezonit veror. Në një njoftim për mediat, përfaqësuesit e bizneseve amerikane shprehen se problematika të përsëritura si mungesa e ujit të pijshëm, ndotja nga mbetjet, keqmenaxhimi i ujërave të zeza dhe ndërtimet e pakontrolluara në zonat turistike po dëmtojnë rëndë jo vetëm sektorin e akomodimit, por edhe cilësinë e jetesës për turistët dhe banorët.
“Anëtarët tanë flasin për zona bregdetare ku vazhdon të jetë shqetësuese mungesa e ujit të pijshëm, keqmenaxhimi i ujërave të zeza dhe ndërtimet që vazhdojnë edhe gjatë sezonit turistik, duke penguar funksionimin normal të strukturave akomoduese dhe duke ndikuar negativisht në përvojën e turistëve”, thuhet në deklaratën e Dhomës.
Një tjetër problem i rëndë është mungesa e stafit të trajnuar në sektorin e turizmit, çka sipas Dhomës Amerikane, po ndikon drejtpërdrejt në konkurrueshmërinë e Shqipërisë krahas destinacioneve të tjera në rajon. Këto mangësi, sipas biznesit amerikan, rrezikojnë që Shqipëria të dalë nga harta e destinacioneve të preferuara turistike.
Përballë kësaj situate, Dhoma Amerikane i bën thirrje qeverisë, pushtetit vendor dhe institucioneve përkatëse që të marrin masa urgjente për të përmirësuar menaxhimin e sektorit, duke e konsideruar turizmin si një shtyllë kyçe të ekonomisë shqiptare./skyweb.al
