Bashkimi Evropian ka vendosur të ndalojë importet e mishit nga Brazili duke nisur nga 3 shtatori, vetëm pak muaj pasi marrëveshja e tregtisë së lirë BE-Mercosur hyri në fuqi më 1 maj.
Shkaku kryesor i këtij vendimi lidhet me përdorimin e antimikrobikëve për stimulimin e rritjes së kafshëve në Brazil, një praktikë që bie ndesh me standardet e sigurisë ushqimore të BE-së. Një komitet ekspertësh nga shtetet anëtare votoi unanimisht për ta hequr Brazilin nga lista e vendeve që respektojnë këto standarde, duke e bërë atë shtetin e parë që përjashtohet për këtë arsye.
Vendimi tregon se, megjithëse marrëveshja BE-Mercosur synon liberalizimin e tregtisë bujqësore, rregullat e sigurisë ushqimore të Unionit mbeten të panegociueshme. Nga shtatori, Brazili nuk do të ketë më të drejtë të eksportojë në tregun evropian produkte si mish gjedhi, kuaj, shpendë, vezë, produkte akuakulture, mjaltë dhe zorrë.
Zëdhënësja e Komisionit Evropian, Eva Hrncirova, theksoi se marrëveshjet tregtare nuk ndryshojnë rregullat e BE-së dhe se ato vlejnë njësoj si për fermerët evropianë, ashtu edhe për eksportuesit nga vendet e treta.
Marrëveshja BE-Mercosur ka shkaktuar reagime të forta nga fermerët evropianë, të cilët shprehin shqetësime për konkurrencë të padrejtë për shkak të standardeve të ndryshme të prodhimit. Për këtë arsye, Brukseli ka negociuar masa mbrojtëse, duke përfshirë kuota për produkte të ndjeshme si mishi dhe shpendët, si edhe mekanizma për monitorimin e tregut.
Në rast se Brazili arrin të përmbushë kërkesat e sigurisë ushqimore të BE-së, importet mund të rifillojnë dhe vendi do të përfitojë nga lehtësimet tarifore të parashikuara në marrëveshjen e re, ashtu si Argjentina, Paraguai dhe Uruguai.
