Lufthansa po merr kontrollin pothuajse të plotë të ITA Airways, duke e kthyer kompaninë italiane, trashëgimtaren e Alitalia-s, në pjesë të drejtpërdrejtë të grupit gjerman.
Kompania njoftoi se do të ushtrojë opsionin për blerjen e 49 për qind të tjera të aksioneve të ITA Airways, për një vlerë prej 325 milionë eurosh. Me këtë lëvizje, pjesëmarrja e Lufthansa-s në kompaninë italiane rritet nga 41 për qind në 90 për qind.
Marrëveshja pritet të finalizohet në tremujorin e parë të vitit 2027, pasi të marrë miratimet rregullatore nga Komisioni Europian dhe Departamenti Amerikan i Drejtësisë. Ministria italiane e Ekonomisë do të mbajë ende 10 për qind të aksioneve deri në vitin 2028.
ITA Airways u krijua pas falimentimit të Alitalia-s, kompanisë historike italiane që për vite me radhë u mbajt në këmbë përmes shpëtimeve shtetërore, krizave financiare dhe përpjekjeve të dështuara për ristrukturim.
Për Lufthansa-n, blerja nuk është thjesht një zgjerim aksionesh.
Grupi gjerman synon ta integrojë plotësisht ITA Airways në rrjetin e tij, duke e përdorur Italinë si një bazë më të fortë për fluturimet drejt Amerikës së Jugut, Amerikës së Veriut dhe tregjeve të tjera ndërkombëtare.
ITA Airways ka nisur tashmë integrimin me sistemet e Lufthansa-s, përfshirë rezervimet, shitjet, programin Miles & More dhe aksesin në rrjetin e Star Alliance.
Me këtë marrëveshje, një nga simbolet më të njohura të aviacionit italian kalon praktikisht nën kontroll gjerman./skyweb.al
