Kryeministri Edi Rama ka paralajmëruar ndarjen e AKSHI-t në dy pjesë, ndërsa prezantoi kompaninë e re publike “Albanian Digital Solutions” si fazën e ardhshme të transformimit digjital të shtetit shqiptar.
Duke folur në “Shënimet e Javës”, Rama tha se Agjencia Kombëtare e Shoqërisë së Informacionit do të ketë rolin e drejtuesit, rregullatorit dhe monitoruesit të cilësisë, ndërsa kompania e re publike, e njohur si ADS, do të jetë struktura që do të prodhojë zgjidhje teknologjike dhe do të garantojë mirëmbajtjen e sistemeve shtetërore.
“Këtë javë prezantuam edhe një kompani të re publike, Albanian Digital Solutions, një kompani të re publike që shënon fazën e re të transformimit dixhital të shtetit shqiptar”, tha Rama.
Sipas kryeministrit, Shqipëria ka kaluar tashmë fazën e ndërtimit të platformave dhe të dixhitalizimit të më shumë se 1200 shërbimeve publike, të cilat prej disa vitesh ofrohen drejtpërdrejt nga telefoni apo kompjuteri përmes e-Albania.
Rama tha se hapi i ri synon të çojë më tej qeverisjen elektronike, duke shfrytëzuar kapacitetet e reja teknologjike për transformimin e administratës dhe të shërbimeve publike.
Sipas tij, “Albanian Digital Solutions” do të funksionojë si një qendër ekselence për talentet shqiptare të teknologjisë dhe do të mbulojë nevojat e sektorit publik për inovacion në shërbime, në qeverisjen qendrore dhe vendore, si dhe në mirëmbajtjen e sistemeve ekzistuese.
Kreu i qeverisë u ndal edhe te rritja e interesit për programet e inovacionit. Ai tha se vetëm në ciklin e fundit të granteve për programin “Startup Albania” janë regjistruar mbi 1100 aplikime.
Sipas Ramës, kjo tregon se Shqipëria ka fituar gradualisht terren në fushën e inovacionit dhe se vendi tashmë ka një pozicion në hartën europiane dhe globale, sidomos në sektorin publik. Megjithatë, ai theksoi se nevojitet më shumë përparim edhe në sektorin privat.
“Kemi nevojë të shfrytëzojmë të gjitha kapacitetet e reja të teknologjisë edhe në qeverisje, gjë që faktikisht e kemi nisur dhe do ta vazhdojmë me intensitet edhe falë kësaj ndarjeje të AKSHI-t në dy pjesë”, u shpreh kryeministri.
Ai sqaroi se modeli i ri do të ndajë funksionet institucionale nga prodhimi dhe mirëmbajtja e zgjidhjeve teknologjike.
“AKSHI do të jetë drejtuesi, rregullatori dhe monitoruesi i cilësisë, ndërsa Albanian Digital Solutions, ADS-ja, do të jetë praktikisht truri që do të prodhojë në mënyrë të vazhdueshme zgjidhjet e nevojshme dhe, nga ana tjetër, do të garantojë mirëmbajtjen e sistemeve tona”, tha Rama.
Krijimi i “Albanian Digital Solutions” vjen në një moment kur qeveria synon të rrisë kapacitetet teknologjike brenda sektorit publik dhe të krijojë një strukturë të posaçme për zhvillimin, përditësimin dhe mirëmbajtjen e sistemeve digjitale të shtetit.
Sipas qeverisë, kompania e re do të ketë rol qendror në fazën e ardhshme të transformimit digjital, ndërsa AKSHI do të mbetet institucioni që drejton, rregullon dhe kontrollon cilësinë e këtij procesi.
