Kryeministri Edi Rama ka deklaruar se nuk do të tërhiqet nga projekti i kundërshtuar në Zvërnec, edhe nëse në shesh do të dilnin qindra mijëra protestues.
Duke iu referuar protestave qytetare të ditëve të fundit, Rama tha se vendimmarrja e tij lidhet me mandatin e marrë nga zgjedhjet dhe me votuesit që kanë mbështetur Partinë Socialiste.
“Jo 5 mijë veta, por 500 mijë të dalin në shesh, nuk mjaftojnë. Janë 800 e ca kusur mijë që kanë bërë marrëveshje me mua dhe PS”, u shpreh kryeministri.
Rama tha se projekti nuk ka dalë papritur, por është përmendur prej tij edhe gjatë fushatës elektorale. Ai solli si shembull Tivatin në Mal të Zi, duke thënë se dikur ishte një zonë e pazhvilluar dhe bazë ushtarake, ndërsa sot është kthyer në një destinacion turistik.
“Ky investim nuk doli sot papritur. Unë e kam thënë në fushatë. Unë isha në Tivat, erdha direkt nga Tivati këtu. Tivati ishte vendi më i pazhvilluar në Mal të Zi, nuk shkonin turistë se ishte bazë ushtarake”, tha Rama.
Deklarata vjen në një moment kur protestat kundër projektit në Zvërnec kanë vijuar për disa ditë radhazi, ndërsa debati publik është zgjeruar përtej çështjes së investimit, duke përfshirë edhe raportin mes vendimmarrjes së qeverisë dhe reagimit qytetar.
