Ish-drejtoresha e Agjencisë Kombëtare të Shoqërisë së Informacionit, Mirlinda Karçanaj, është paraqitur këtë të martë në ambientet e SPAK-ut.
Karçanaj është paraqitur në zbatim të masës së sigurisë “detyrim paraqitje”, të vendosur ndaj saj në kuadër të hetimeve për dosjen e AKSHI-t.
Ish-drejtoresha dyshohet nga Prokuroria e Posaçme si pjesë e një grupi të strukturuar kriminal, së bashku me persona të tjerë, mes të cilëve Ergys Agasi dhe biznesmeni Ermal Beqiri.
Hetimet lidhen me procedurat e prokurimit dhe tenderët e zhvilluar në Agjencinë Kombëtare të Shoqërisë së Informacionit.
Ndaj personave të përfshirë në dosje janë ngritur akuza për konkurrencë të paligjshme nëpërmjet dhunës, heqje të paligjshme të lirisë dhe shkelje të barazisë së pjesëmarrësve në tenderë apo ankande publike.
Ata hetohen gjithashtu për veprat penale të grupit të strukturuar kriminal dhe pastrimit të produkteve të veprimtarisë kriminale.
Mirlinda Karçanaj do të vijojë të paraqitet pranë SPAK-ut sipas afateve të përcaktuara në masën e sigurisë, ndërsa hetimet për dosjen e AKSHI-t vazhdojnë. /skyweb.al
