Elisa Spiropali ka sfiduar sërish Edi Ramën, këtë herë në një nga momentet më të vështira politike për kryeministrin, kur protestat qytetare po mbushin çdo ditë sheshin dhe po kthehen nga një kauzë mjedisore në një reagim më të gjerë kundër mënyrës së qeverisjes.
Vetëm pak javë më parë, gjatë një mbledhjeje të Grupit Parlamentar të PS, Rama e kishte paralajmëruar hapur Spiropalin se nuk do të kishte një herë të tretë.
Kryeministri iu drejtua asaj duke përmendur mungesën në votim dhe postimet në rrjetet sociale.
“Herën e parë nuk erdhe në votim. Herën e dytë bëre çarçafin dhe herën e tretë nuk ka, del jashtë këtij grupi”, mësohet të ketë thënë Rama në mbledhje.
Ai kishte shtuar se në parti nuk mund të krijohen “drama” dhe se brenda Partisë Socialiste “ka dy ngjyra, bardhë e zi”, duke e vendosur Spiropalin përballë një zgjedhjeje të qartë politike.
Por Spiropali duket se nuk është tërhequr. Në një reagim të gjatë publik, ajo ka folur për protestat e ditëve të fundit, duke i trajtuar jo si një episod kalimtar, por si shenjë të një krize më të thellë politike dhe institucionale.
Në tekstin e saj, ajo krahason protestat aktuale me protestën e heshtur të qytetarëve të Tiranës në fundin e diktaturës, duke thënë se ngjarjet e sotme duhen shqyrtuar me seriozitet dhe përgjegjësi.
Spiropali shkruan se Shqipëria ka nevojë për “një marrëveshje të re me vetveten”, ku shteti të jetë më i madh se pushteti dhe institucionet më të forta se personat që e ushtrojnë atë.
Ajo flet për nevojën që Parlamenti të mos jetë vetëm vendi ku miratohen vendime, por edhe hapësira ku dëgjohet shoqëria, ndërsa kërkon më shumë garë politike, sistem zgjedhor më përfaqësues, media më të lira dhe ekonomi më pak të varur nga afërsia me pushtetin.
Mesazhi i saj prek disa nga pikat më të ndjeshme të pushtetit të Ramës, përfshirë kontrollin institucional, korrupsionin, mungesën e llogaridhënies, dobësinë e opozitarizmit dhe largimin e të rinjve.
Në thelb, Spiropali nuk ka bërë një reagim të zakonshëm politik. Ajo ka vendosur në qendër pyetjen nëse pushteti në Shqipëri është bërë më i fortë se mekanizmat që duhet ta kontrollojnë.
Kjo e bën reagimin e saj edhe më të rëndë politikisht, pikërisht sepse vjen nga një figurë e lartë e Partisë Socialiste dhe jo nga opozita.
Tani mbetet për t’u parë nëse Rama do ta konsiderojë këtë si “herën e tretë” që vetë kishte paralajmëruar, apo do ta falë sërish një nga bashkëpunëtoret e tij më të hershme politike.
Në çdo rast, Spiropali ka hapur publikisht një debat që shkon përtej protestës së ditës dhe prek vetë mënyrën si funksionon pushteti në Shqipëri. /skyweb.al
