Konsumimi i moderuar i kafesë mund të ketë efekte pozitive për zemrën dhe shëndetin e përgjithshëm, sipas një deklarate të re të Shoqatës Amerikane të Zemrës.
Pirja e deri në pesë filxhanëve kafe të zezë në ditë lidhet me një rrezik më të ulët për goditje në tru, insuficiencë kardiake dhe sëmundje të zemrës.
Konsumimi i rregullt i pijeve me kafeinë është lidhur gjithashtu me një rrezik më të ulët për zhvillimin e demencës dhe disa llojeve të kancerit.
Megjithatë, ekspertët paralajmërojnë se tejkalimi i pesë filxhanëve dhe i kufirit prej rreth 400 miligramësh kafeinë në ditë mund të ketë pasoja negative.
Sasitë e larta të kafeinës mund të shkaktojnë rritje të menjëhershme të tensionit, çrregullime të frymëmarrjes dhe, në raste të rënda, kriza konvulsive.
Rreziku është më i madh te pijet energjike dhe suplementet me kafeinë, pasi mund të përmbajnë përqendrime shumë më të larta se një filxhan i zakonshëm kafeje.
Sipas Shoqatës Amerikane të Zemrës, këto produkte shpesh përmbajnë edhe përbërës të tjerë që mund të përshpejtojnë përthithjen e kafeinës dhe të rrisin presionin e gjakut.
Ekspertët theksojnë se reagimi ndaj kafeinës ndryshon nga një person te tjetri.
Një sasi që tolerohet mirë nga dikush tjetër mund të shkaktojë rrahje të shpejta të zemrës, ankth ose pagjumësi.
Edhe dy filxhanë kafe mund të shkaktojnë te disa persona palpitacione, tension të lartë, të përziera, dhimbje koke, shqetësime në stomak dhe dridhje.
Administrata Amerikane e Ushqimit dhe Barnave paralajmëron se efektet toksike mund të shfaqen rreth nivelit 1.200 miligramë kafeinë.
Për shumicën e të rriturve, kufiri prej 400 miligramësh në ditë konsiderohet i pranueshëm, por ekspertët këshillojnë që secili të vëzhgojë reagimin e trupit dhe të konsultohet me mjekun nëse shfaq simptoma. /Telegraph
