Qeveria greke po merr masa për të frenuar rritjen e kostos së jetesës, me një marrëveshje të re për uljen e çmimeve në supermarkete. Nisma hyn në fuqi më 31 gusht 2026 dhe do të jetë në fuqi të paktën deri në fund të dhjetorit.
Sipas transmetuesit publik grek ERT, uljet e dakordësuara deri tani arrijnë mesatarisht në rreth 7%. Furnizuesit kanë ofruar ulje prej rreth 5%, ndërsa supermarketet pritet të shtojnë edhe 1.5 deri në 2% të tjera.
Aktualisht, marrëveshja përfshin rreth 1,100 produkte, por lista pritet të zgjerohet me 200 deri në 300 artikuj të tjerë gjatë ditëve në vijim.
Nëse parashikimi i Ministrisë së Zhvillimit realizohet, numri total i produkteve me çmime të reduktuara mund të arrijë në 1,500.
Në listë janë përfshirë disa prej produkteve më të përdorura nga familjet, duke nisur nga mishi, bulmeti dhe vezët, deri te makaronat, kafeja, ushqimet për bebe dhe detergjentët. Pjesë e marrëveshjes do të jenë edhe artikujt shkollorë, në një moment kur familjet përballen me shpenzimet e fillimit të vitit shkollor.
Për t’u përfshirë në nismë, produktet duhet të kenë një ulje prej të paktën 5%, ndërsa zbritja duhet të zgjasë nga dy deri në katër muaj. Për disa artikuj, uljet pritet të jenë edhe më të mëdha dhe të arrijnë në përqindje dyshifrore.
Deri tani, rreth 60 furnizues kanë shprehur interes për të marrë pjesë në marrëveshje, ndërsa pritet që në ditët në vijim të bashkohen edhe kompani të tjera.
Ministri grek i Zhvillimit, Takis Theodorikakos, tha se objektivi kryesor është që uljet të prekin produkte që konsumohen gjerësisht dhe që kanë ndikim të drejtpërdrejtë në buxhetin familjar.
“Për dikë që llogarit me shumë kujdes sa shpenzon në supermarket, ulja e kostos mujore me 40 ose 50 euro është e rëndësishme”, deklaroi ai.
Theodorikakos theksoi se qeveria nuk duhet të jetë e vetëkënaqur, pasi jo të gjitha produktet kanë pësuar ulje dhe disa çmime vijojnë të rriten.
Sipas të dhënave të Eurostat të cituara nga ministri, çmimet e ushqimeve në Greqi shënuan në korrik një ndryshim vjetor prej -0.4%, ndërsa krahasuar me qershorin ranë me 2.3%, duke shënuar ndryshimin më të ulët mujor në eurozonë.
Nisma për uljen e çmimeve do të nisë më 31 gusht dhe do të zgjasë të paktën deri më 31 dhjetor, me synimin për të ulur presionin mbi buxhetet e familjeve greke. /skyweb.al
