Tkurrja e prodhimit vendas nuk po prek vetëm blegtorinë. Të dhënat e fundit të INSTAT tregojnë se edhe prodhimi i drithërave ka vijuar rënien gjatë vitit 2025, me grurin dhe misrin që kanë shënuar një tjetër vit negativ.
Në total, gjatë vitit të kaluar në Shqipëri u prodhuan rreth 624 mijë tonë drithëra, nga 649.9 mijë tonë në vitin 2024. Brenda një viti nga fushat shqiptare kanë dalë rreth 26 mijë tonë më pak drithëra, një rënie prej afro 4%. INSTAT konfirmon se prodhimi i drithërave në 2025 ishte 623,957 tonë.
Rënia bëhet edhe më e dukshme nëse krahasimi bëhet me vitin 2023, kur prodhimi arriti në 701.3 mijë tonë. Brenda dy viteve Shqipëria ka humbur kështu rreth 77 mijë tonë.
Goditjen më të fortë e ka marrë gruri. Prodhimi zbriti në 162.6 mijë tonë në vitin 2025, nga 180.8 mijë tonë një vit më parë, ose me 10.1% më pak. Edhe INSTAT e evidenton grurin si një prej kulturave kryesore me rënie gjatë vitit të kaluar.
Në vitin 2020 Shqipëria prodhonte rreth 233.4 mijë tonë grurë, ndërsa pesë vite më vonë prodhimi është rreth 71 mijë tonë më i ulët. Kjo përkthehet në një tkurrje prej më shumë se 30%.
Edhe misri, kultura që zë pjesën më të madhe të prodhimit të drithërave, ka humbur terren. Në vitin 2025 u prodhuan 400.5 mijë tonë, rreth 9.9 mijë tonë më pak se në 2024, ose një rënie prej 2.4%.
Problemi bëhet më i dukshëm kur të dhënat e bujqësisë vendosen përballë atyre të blegtorisë.
Në vitin 2025 numri i deleve zbriti në 1.166 milionë krerë, 0.9% më pak se një vit më parë, ndërsa numri i dhive ra me 7.4%, nga 615 mijë në 570 mijë krerë. Te derrat rënia ishte edhe më e fortë, plot 28.2%, ndërsa shpendët u pakësuan me 0.5%. Vetëm gjedhët shënuan një rritje të lehtë vjetore prej 1.1%, në 275 mijë krerë.
Por kjo rritje e vogël nuk ndryshon panoramën afatgjatë. Në vitin 2020 Shqipëria kishte rreth 363 mijë gjedhë, 1.558 milionë dele dhe 774 mijë dhi. Pesë vite më vonë gjedhët janë rreth 24% më pak, delet 25% më pak dhe dhitë mbi 26% më pak. Numri i derrave është përgjysmuar, nga rreth 158 mijë në vetëm 75 mijë krerë.
Edhe prodhimi i qumështit pasqyron tkurrjen e sektorit. Nga rreth 1.05 milionë tonë në vitin 2020, prodhimi ka zbritur në rreth 868 mijë tonë në 2025, ose afërsisht 17% më pak.
Të dhënat tregojnë kështu një problem që shkon përtej një kulture apo një viti të vetëm. Shqipëria po prodhon më pak grurë, më pak misër dhe mban dukshëm më pak bagëti se pesë vite më parë, duke treguar një tkurrje të vazhdueshme të bazës prodhuese të bujqësisë dhe blegtorisë vendase.
Vetëm për drithërat, prodhimi ka rënë nga 684 mijë tonë në vitin 2020 në 624 mijë tonë në 2025, ndërsa gruri ka humbur gati një të tretën e prodhimit.
Nëse kjo tendencë vazhdon, pesha e prodhimit vendas në furnizimin e tregut ushqimor do të vijojë të dobësohet, duke e bërë ekonominë shqiptare gjithnjë e më të ekspozuar ndaj importeve dhe luhatjeve të çmimeve në tregjet ndërkombëtare. /skyweb.al
