Tatimpaguesit shqiptarë kanë kursyer rreth 140 milionë euro përmes procesit të rivlerësimit të pasurive të paluajtshme.
Sipas të dhënave të publikuara nga Drejtoria e Përgjithshme e Tatimeve, kjo është vlera e kostos fiskale të kursyer gjatë periudhës mars–gusht 2026.
Procesi u ka mundësuar qytetarëve dhe bizneseve të përditësojnë vlerën e pronave të tyre duke përfituar nga një barrë tatimore më e ulët.
Përfitimi bëhet veçanërisht i rëndësishëm në rastin e shitjes së pasurisë, pasi tatimi llogaritet mbi diferencën ndërmjet çmimit të shitjes dhe vlerës së rivlerësuar.
Administrata Tatimore e cilëson këtë mekanizëm një lehtësi konkrete fiskale, me përfitim të drejtpërdrejtë për tatimpaguesit.
Shifra prej 140 milionë eurosh brenda gjashtë muajve tregon interesin e lartë për rivlerësimin, por edhe ndikimin financiar të këtij procesi për pronarët e pasurive të paluajtshme. /skyweb.al
