Prej tre ditësh, grupet e konstatimit të dëmeve kanë nisur verifikimet në terren në zonat e bashkisë së Fierit të prekura nga zjarret, për të evidentuar nga afër pasojat e shkaktuara nga flakët.
Gjatë këtyre ditëve janë konstatuar 15 objekte të dëmtuara ose të djegura, pjesa më e madhe e të cilave ishin të braktisura ose përdoreshin si stalla për mbajtjen e bagëtive. Vetëm në pak raste është konstatuar se brenda tyre kishte orendi shtëpiake.
Dëmet më të mëdha, megjithatë, janë regjistruar në kulturat bujqësore. Pikërisht për këto dëme, fermerët dhe banorët e zonave të prekura shpresojnë më shumë tek dëmshpërblimi, pasi aktiviteti bujqësor dhe blegtoral përbën burimin kryesor, e në shumë raste të vetëm, të të ardhurave për familjet e tyre.
Procesi i vlerësimit pritet të jetë kompleks, për shkak të mungesës së dokumentacionit që fermerët disponojnë për sipërfaqet e tokës që punojnë dhe kulturat bujqësore të mbjella. Kjo mund ta vështirësojë evidentimin dhe përllogaritjen e saktë të dëmeve.
Paraprakisht, dëmet në bujqësi dhe blegtori përllogariten në disa qindra milionë lekë, bazuar në deklarimet e vetë fermerëve në të paktën gjashtë fshatra të përfshirë nga zjarret. Shifrat përfundimtare pritet të përcaktohen pas përfundimit të procesit të verifikimit dhe vlerësimit në terren.
