Policia e Tiranës njoftoi sot zbulimin e një depoje me 344 kuti fishekzjarresh, me vlerë rreth 40 mijë euro, duke arrestuar edhe një 24-vjeçar. Sipas Policisë, dyshohet se këto fishekzjarre furnizonin grupet e dhunshme të protestuesve, të cilët i përdornin më pas kundër forcave të rendit.
Ndërhyrja është plotësisht e justifikuar. Por ajo ngre një pyetje tjetër: Përse nuk tregohet e njëjta vendosmëri kur fishekzjarret përdoren kundër qytetarëve?
Prej vitesh, në Tiranë dhe qytete të tjera, fëmijë, të moshuar dhe familje të tëra terrorizohen në mesnatë nga shpërthimet e fishekzjarreve. Mjafton që ndonjë personazh shpellash të festojë ditëlindjen, fejesën apo ndonjë rast tjetër dhe një lagje e tërë duhet të zgjohet nga shpërthimet.
Fishekzjarre në mes të pallateve, pranë banesave, në orët e vona të natës, sikur qyteti të jetë pronë private e atij që ka vendosur të festojë.
Megjithatë, qytetarët vazhdojnë të përballen me këtë fenomen, pa parë një reagim të mjaftueshëm dhe të vazhdueshëm të Policisë. Me sa duket, është dashur që fishekzjarret të drejtohen kundër vetë Policisë që lufta ndaj tyre të marrë vëmendje të veçantë.
Por përdorimi i paligjshëm i lëndëve piroteknike nuk bëhet problem vetëm kur rrezikohen uniformat blu.
Edhe qytetarët kanë të drejtë të flenë të qetë, pa u zgjuar në mesnatë nga shpërthimet e dikujt që mendon se ditëlindja e tij duhet ta marrë vesh e gjithë Tirana!
