Zierja e karavidheve ndërsa janë ende gjallë pritet të ndalohet në Angli si pjesë e një strategjie qeveritare për përmirësimin e mirëqenies së kafshëve, raportoi “The Guardian”.
Kjo praktikë është tashmë e ndaluar me ligj në vende si Zvicra, Norvegjia dhe Zelanda e Re. Sipas organizatave bamirëse për mbrojtjen e kafshëve, metoda më humane përfshijnë trullosjen e karavidheve me pajisje elektrike ose ekspozimin e tyre ndaj ajrit të ftohtë apo akullit përpara zierjes.
Ndalimi do të mbështetet në një ligj të miratuar nga Konservatorët në vitin 2022, i cili njeh jovertebrorët, si oktapodët, gaforret dhe karavidhet si qenie të ndjeshme që janë në gjendje të ndiejnë dhimbje.
“Vendosja e kafshëve të gjalla dhe të vetëdijshme në ujë të valë u shkakton atyre vuajtje të mëdha për disa minuta. Kjo është një formë torture dhe mund të shmanget plotësisht. Alternativat humane, si trullosja elektrike, janë të disponueshme”, deklaroi Ben Sturgeon, drejtor ekzekutiv i organizatës “Crustacean Compassion”.
Strategjia e re e Partisë Laburiste, e shpallur sot, përfshin gjithashtu ndalimin e kafazeve për pulat dhe arkave të pjelljes për derrat, fundin e mbarështimit të këlyshëve për tregti, konsultime për ndalimin e jakave me elektroshok për qentë dhe vendosjen e standardeve humane për therjen e peshqve të kultivuar.
Propozimet parashikojnë edhe shtrëngimin e rregullave të gjuetisë, përfshirë ndalimin e gjuetisë së lepujve gjatë sezonit të shumimit dhe ndalimin e gjuetisë në shtigje.
Në manifestin e saj, Partia Laburiste është zotuar të zgjerojë ndalimin e gjuetisë së dhelprave të vitit 2005 edhe për gjuetinë në shtigje, pasi organizatat për mbrojtjen e kafshëve pretendojnë se kjo praktikë po përdoret për të vazhduar vrasjen e dhelprave. /skyweb.al
