Shqipëria është pajisur me sistemet raketore kundërtanke Javelin, si rezultat i bashkëpunimit me Shtetet e Bashkuara të Amerikës. Lajmin e ka bërë të ditur ministri i Mbrojtjes, Pirro Vengu, përmes një postimi në rrjetet sociale.
Sipas tij, këto sisteme do të rrisin ndjeshëm aftësitë mbrojtëse të Forcave të Armatosura shqiptare, do të forcojnë parandalimin, ndërveprueshmërinë me NATO-n dhe sigurinë kombëtare. Vengu sqaroi se dorëzimi i parë i njësive të lëshimit Javelin është kryer tashmë në një bazë të Forcës Tokësore, pa dhënë detaje mbi vendndodhjen.
Ai theksoi se kjo pajisje është siguruar në kuadër të ndihmës dhe bashkëpunimit bilateral me SHBA-të, ku përfshihen si Shqipëria ashtu edhe Kosova. Ministri nënvizoi tre aspekte kryesore të rëndësisë së kësaj dërgese: realizimin e një kërkese të kahershme të Forcave të Armatosura, forcimin e bashkëpunimit strategjik me SHBA-të dhe aftësimin e personelit ushtarak me sisteme moderne dhe teknologji të avancuar.
Vengu bëri të ditur se kjo është vetëm dërgesa e parë e njësive të lëshimit dhe raketave përkatëse, ndërsa një dërgesë e dytë pritet gjatë vitit të ardhshëm. Ai shtoi se këto sisteme do të rrisin gjithashtu efektivitetin e trupave shqiptare në misionet e NATO-s dhe të Bashkimit Evropian.
Sistemet Javelin janë armë të avancuara kundërtanke, të bartshme nga një person dhe me funksionim “zjarr dhe harro”. Ato përdoren nga këmbësoria për neutralizimin e mjeteve të blinduara, bunkerëve dhe objektivave të tjera. Javelin dallohen për drejtimin me infra të kuqe, aftësinë e sulmit nga lart – duke goditur pikat më të dobëta të blindimit, si dhe për përdorimin efektiv si ditën ashtu edhe natën, duke rritur mbijetesën e operatorit.
Sistemi është zhvilluar nga kompanitë Raytheon dhe Lockheed Martin dhe përfshin Njësinë e Komandimit dhe Lëshimit (CLU) për identifikimin dhe shënjestrimin e objektivit, si dhe raketën vetë, duke i mundësuar ushtarit të qëllojë dhe të tërhiqet menjëherë në mbulim pas lëshimit. /skyweb.al
