Prej katër javësh në Greqi po zhvillohen protesta të fermerëve, të cilët kanë bllokuar disa akse kombëtare në shenjë pakënaqësie për vonesat në shpërndarjen e subvencioneve të Bashkimit Europian, pas një skandali korrupsioni.
Mes rrugëve të prekura është edhe aksi Kakavijë–Janinë. Policia Kufitare e Kakavijës ka bërë të ditur se sot, nga ora 19:00 deri në 22:00 (sipas orës greke), kjo rrugë do të jetë e bllokuar. Gjatë kësaj kohe do të lejohen të kalojnë vetëm automjetet me emergjenca shëndetësore.
Sipas njoftimit zyrtar, Policia Kufitare Kakavijë është informuar nga autoritetet greke, përmes qendrës së përbashkët të shkëmbimit të informacionit, se bllokimi do të ndodhë në kryqëzimin e fshatit Kallpaq, për shkak të protestës së fermerëve.
Policia Kufitare Kakavijë u bën thirrje qytetarëve për mirëkuptim dhe këshillon që udhëtimet të planifikohen në orare të tjera të ditës. /skyweb.al
