Rajoni i Toskanës në Itali ka miratuar një masë të re financiare për gratë që dëshirojnë të ruajnë fertilitetin e tyre përmes ngrirjes së vezëve.
Ligji për “ruajtjen e fertilitetit për arsye sociale” u miratua me shumicë votash nga Këshilli Rajonal i Toskanës më 23 shtator 2026. Masa synon të mbështesë procedurën e njohur si “social freezing”, e cila konsiston në marrjen dhe kriokonservimin e vezëve në një moshë më të re, për t’i përdorur potencialisht në të ardhmen përmes teknikave të riprodhimit të asistuar.
Sipas parashikimeve të reja, gratë që plotësojnë kriteret mund të përfitojnë një kontribut deri në 3 mijë euro.
Për të përfituar nga mbështetja, aplikantet duhet të jenë 25 deri në 39 vjeç, të kenë jetuar në Toskanë për të paktën një vit dhe të kenë një ISEE jo më të lartë se 30 mijë euro. ISEE është treguesi që përdoret në Itali për të vlerësuar gjendjen ekonomike të familjes.
Kontributi mund të përdoret edhe në rast se procedura duhet të përsëritet, brenda kufirit maksimal prej 3 mijë eurosh, si dhe për kostot e ruajtjes së vezëve të kriokonservuara.
Procedurat duhet të kryhen në struktura të autorizuara, publike ose private, të kontraktuara me sistemin shëndetësor rajonal.
Megjithatë, mbështetja nuk garantohet automatikisht për të gjitha gratë që plotësojnë kriteret. Nëse numri i aplikimeve tejkalon fondet e disponueshme, përparësi do t’u jepet aplikanteve me ISEE më të ulët. Në rast barazimi, përparësi do të ketë aplikantja më e madhe në moshë.
Për zbatimin e masës janë parashikuar gjithsej 550 mijë euro: 50 mijë euro për pjesën e mbetur të vitit 2026 dhe nga 250 mijë euro për vitet 2027 dhe 2028.
“Social freezing” nuk konsiderohet trajtim për infertilitetin. Procedura u drejtohet grave që nuk kanë domosdoshmërisht probleme shëndetësore, por që për arsye personale ose sociale dëshirojnë ta shtyjnë shtatzëninë dhe të ruajnë vezët në një moshë kur fertiliteti është më i lartë.
Me kalimin e moshës, fertiliteti i gruas bie gradualisht. Ngrirja e vezëve synon të ruajë mundësinë e përdorimit të tyre në të ardhmen, megjithëse nuk garanton një shtatzëni të mëvonshme.
Toskana kishte ndërmarrë masa për ruajtjen e fertilitetit për arsye sociale që në vitin 2019. Ligji i ri synon ta kthejë këtë mbështetje në një mekanizëm financiar më të qëndrueshëm.
Sipas raportimeve të mediave italiane, Toskana bëhet rajoni i dytë në Itali, pas Pulias, që ofron mbështetje financiare publike për procedurën e “social freezing”.
