Një studim i fundit i Gallup nxjerr në pah një prirje shqetësuese globale: deri në 20% e punonjësve në botë përjetojnë vetmi çdo ditë, ndërsa situata është edhe më e rënduar për ata që punojnë nga shtëpia dhe për të rinjtë.
Sipas raportit “State of the Global Workplace”, niveli i vetmisë arrin në 22% për punonjësit që punojnë plotësisht në distancë dhe në 25% për ata nën moshën 35 vjeç.
Të dhënat tregojnë gjithashtu një përkeqësim të përgjithshëm të mirëqenies së punonjësve gjatë vitit 2023, i shoqëruar me rritje të ndjeshme të stresit, trishtimit dhe zemërimit.
Ky zhvillim konsiderohet paradoksal, duke qenë se ndodh në një periudhë që shpesh cilësohet si epokë progresi dhe prosperiteti global.
Drejtuesi i Gallup, John Clifton, e cilëson këtë situatë si alarmante, duke theksuar se përkeqësimi i shëndetit mendor në shkallë globale po ndodh me ritme të shpejta.
Ndërsa eksperti i mjedisit të punës Jim Harter thekson se puna ka një rol qendror në jetën e individit, duke ndikuar në identitetin, jetën sociale dhe shëndetin e tij.
Sipas tij, ndryshimet që kanë ndodhur në mënyrën e punës pas pandemisë, si puna në distancë dhe distancimi fizik, kanë krijuar edhe një fenomen të ri, atë të “distancës mendore”, që po thellon ndjenjën e izolimit.
Psikologia klinike Annabel Chow sugjeron disa mënyra për të përballuar vetminë, duke përfshirë pranimin e saj si një ndjenjë normale njerëzore, ndërtimin e lidhjeve kuptimplota sociale, krijimin e rutinave të shëndetshme, rishikimin e mënyrës së të menduarit dhe ndryshimin e ambientit kur është e nevojshme.
Studimi është bazuar në të dhëna nga më shumë se 160 vende dhe territore në botë, duke e kthyer këtë fenomen në një çështje globale që lidhet drejtpërdrejt me transformimet e tregut të punës dhe mënyrën si organizohet jeta profesionale në epokën moderne. /skyweb.al
