Hetimet e Prokurorisë së Posaçme kanë zbuluar asete të konsiderueshme që dyshohet se u përkasin personave të përfshirë në dosjen e abuzimeve me vlerë qindra milionë euro të tenderave të AKSHI-t. Sipas hetuesve, këto pasuri besohet se janë përfituar nga para me burim të dyshuar kriminal.
Një nga zbulimet më të fundit lidhet me një jaht luksoz, i identifikuar gjatë kontrolleve të Byrosë Kombëtare të Hetimit. Sipas raportimeve të Boldnews, mjeti lundrues “Pretador 50 Sky Fall” rezulton të jetë blerë nga Ermal Beqiri, ndërsa në dokumentet e zotërimit figuron emri i një shtetaseje, Xhenila Tamizi.
Sipas SPAK-ut, kjo skemë dyshohet se është përdorur për të fshehur pronësinë reale të pasurisë.
Jahti ka një vlerë të konsiderueshme financiare, e përllogaritur në rreth 950 mijë dollarë, dhe konsiderohet si një nga asetet luksoze të përfituara në kuadër të skemës së dyshuar të abuzimeve.
Paralelisht, hetimet e SPAK-ut janë zgjeruar edhe drejt pasurive të tjera që dyshohet se janë përfituar përmes kompanive “Soft & Solution” dhe “EA Solution”.
Fokusi tani është vendosur në prona të paluajtshme në Tiranë, përfshirë investime në sektorin e ndërtimit të kullave, si dhe në lidhje me biznesmenë të ndërtimit dhe të naftës. Gjithashtu, po hetohen edhe prona të tjera të shpërndara në disa zona të Shqipërisë.
Në kuadër të gjurmimit financiar, SPAK ka kërkuar informacion pranë bankave të nivelit të dytë, me qëllim ndjekjen e rrjedhës së parave, si dhe pranë institucioneve të hipotekave për të identifikuar pasuritë e regjistruara në emra të ndryshëm.
Më herët, skyweb.al ka denoncuar aferat me pronat gjatë procesit të digjitalizimit të kadastrës, një skandal i cili, sipas burimeve, pritet të marrë përmasa edhe më të mëdha se dosja e AKSHI-t, sapo hetimet të shkojnë në fazën e zbardhjes së plotë. /skyweb.al
