Qeveria ka ndërmarrë një ndryshim të rëndësishëm në arkitekturën e administrimit territorial, duke zgjeruar ndjeshëm rolin e prefektëve dhe duke krijuar për herë të parë pozicionin e Prefektit Detar. Ndryshimet parashikohen në projektligjin e ri “Për prefektin e qarkut”, i hedhur për konsultim publik, i cili synon të rikthejë peshën institucionale të prefektit, e cila është zbehur ndjeshëm gjatë dekadave të fundit.
Sipas draftit të konsultuar nga Skyweb.al, prefekti nuk do të ketë më vetëm një rol formal të kontrollit të ligjshmërisë së akteve të pushtetit vendor, por do të shndërrohet në një aktor aktiv të koordinimit mes institucioneve qendrore dhe atyre vendore.
Në fokus të këtij zgjerimi janë siguria publike, emergjencat civile dhe funksionimi i administratës shtetërore në territor.
Ndryshimi më i rëndësishëm strukturor është krijimi i Prefektit Detar, një funksion i ri që do të mbulojë zonat bregdetare të vendit.
Projektligji parashikon ngritjen e dy prefekturave detare, një për zonën mbi lumin Seman dhe një për zonën nën Seman, me qendër respektivisht në Durrës dhe Vlorë.
Prefekti Detar do të ketë juridiksion mbi sigurinë detare, monitorimin e vijës bregdetare, menaxhimin e emergjencave civile në det dhe koordinimin e institucioneve që veprojnë në hapësirën detare.
Në relacionin shoqërues të projektligjit theksohet se ky ndryshim synon të adresojë boshllëqet institucionale në administrimin e territorit bregdetar, një zonë e ekspozuar ndaj aktiviteteve të paligjshme, presionit ndërtimor dhe emergjencave natyrore, por edhe me peshë të lartë ekonomike dhe turistike.
Paralelisht, projektligji forcon rolin e prefektit në qarqe, duke i dhënë kompetenca më të qarta koordinuese me Policinë e Shtetit dhe Policinë Bashkiake, si dhe një rol më aktiv në Këshillat Vendorë të Sigurisë Publike.
Prefekti do të ketë detyrimin të ndjekë problematikat në territor dhe të raportojë drejtpërdrejt në nivel qendror, në rastet kur institucionet përgjegjëse nuk reagojnë.
Qeveria argumenton se këto ndryshime synojnë të rikthejnë prefektin si nyje funksionale të shtetit në territor, pas një periudhe të gjatë ku ky institucion është perceptuar kryesisht si ceremonial dhe me ndikim të kufizuar real.
Me krijimin e Prefektit Detar dhe zgjerimin e kompetencave ekzistuese, synohet një administrim më i centralizuar dhe më efektiv i territorit, veçanërisht në zonat me ndjeshmëri të lartë strategjike. /skyweb.al
