Këshilli Mbikëqyrës i Bankës së Shqipërisë ka miratuar disa ndryshime në rregulloren “Për licencimin, organizimin, veprimtarinë dhe mbikëqyrjen e zyrave të këmbimit valutor”, në mbledhjen e fundit të tij.
Vendimi vjen pas rasteve të evidentuara ku disa zyra këmbimi janë përdorur për kanalizimin e sasive të mëdha të parave me burim të paligjshëm, duke rritur shqetësimin për pastrimin e parave dhe financimin e aktiviteteve kriminale.
Ndryshimet e reja synojnë forcimin e procesit të licencimit dhe mbikëqyrjes së këtyre subjekteve, duke i përafruar me standardet ndërkombëtare dhe rekomandimet e Moneyval. Fokus i veçantë është vendosur tek reputacioni, integriteti dhe qëndrueshmëria financiare e subjekteve që kërkojnë licencë.
Risi të rëndësishme janë: rritja e kapitalit fillestar, detyrimi për dokumentimin e burimit të kapitalit, si dhe kritere më të rrepta për ushtrimin e aktivitetit. Këto masa synojnë të garantojnë që në treg të operojnë vetëm subjekte që plotësojnë kushtet e nevojshme të stabilitetit financiar, drejtimit të përgjegjshëm dhe transparencës në strukturat e zotërimit të kapitalit.
Banka e Shqipërisë theksoi se me këtë vendim synohet të rritet integriteti i sektorit dhe të forcohet mbrojtja ndaj risqeve të pastrimit të parave dhe financimit të terrorizmit. /skyweb.al
