Autoriteti Kombëtar për Sigurinë Kibernetike ka paralajmëruar qytetarët për qarkullimin e një mesazhi mashtrues, i cili synon t’u marrë para përmes kërkesave të rreme për pagesë gjobash të qarkullimit rrugor.
Sipas AKSK, mesazhi mbërrin në celular në formë SMS dhe përmban një link mashtrues, i cili nuk duhet klikuar, pasi bëhet fjalë për një tentativë “phishing”. Ky komunikim nuk është zyrtar dhe nuk vjen nga asnjë institucion shtetëror.
“Po qarkullon një mesazh ‘smishing’ që synon të mashtrojë qytetarët me gjoba të rreme për shkelje të rregullave të qarkullimit rrugor. Mesazhi përmban një link mashtrues dhe kërkon kryerjen e pagesave online. Çdo qytetar duhet ta injorojë dhe të mos japë të dhëna personale”, njofton AKSK.
Autoriteti bën me dije se janë marrë menjëherë masa për raportimin dhe bllokimin e faqes së rreme, me qëllim parandalimin e dëmeve të mundshme.
Edhe Policia e Shtetit ka reaguar lidhur me këtë rast, duke theksuar se mesazhet mashtruese imitojnë faqen zyrtare të institucionit dhe synojnë përfitimin e të dhënave personale dhe bankare të qytetarëve.
Sipas Policisë, linket e dërguara çojnë drejt një faqeje të rreme që përdor stemën, imazhe dhe elemente grafike të ngjashme me ato zyrtare, ku qytetarëve u kërkohet fillimisht numri i telefonit, më pas targa e automjetit dhe në fund të dhënat bankare, me pretendimin për pagesë gjobe.
Policia sqaron se kjo faqe nuk është zyrtare dhe përdor një adresë interneti të rreme, e cila nuk i përket asnjë institucioni shtetëror.
Autoritetet u bëjnë thirrje qytetarëve që të mos klikojnë në lidhje të dyshimta, të mos vendosin të dhëna personale apo bankare në faqe jozyrtare dhe të verifikojnë çdo informacion vetëm përmes kanaleve zyrtare.
Në rast dyshimi apo mashtrimi, qytetarët ftohen të njoftojnë menjëherë Policinë e Shtetit ose strukturat për hetimin e krimit kibernetik.
