Agjencia Shtetërore e Kadastrës u bën thirrje qytetarëve që çdo kontratë qiraje e lidhur me akt noterial të regjistrohet në Regjistrin e Pasurive të Paluajtshme brenda afatit 30-ditor. Sipas ASHK-së, ky proces kryhet plotësisht online përmes portalit e-Albania.
Institucioni thekson se regjistrimi i kontratës së qirasë rrit transparencën dhe garanton mbrojtjen e të drejtave pronësore, ndërsa të gjitha të dhënat përkatëse pasqyrohen automatikisht në kartelën e pasurisë.
ASHK nënvizon se aplikimi është i thjeshtë dhe i shpejtë. Qytetarët duhet fillimisht të identifikohen në e-Albania, të zgjedhin shërbimin “Regjistrimi i kontratës së qirasë/nënqirasë” dhe të plotësojnë formularin përkatës. Gjatë aplikimit kërkohet ngarkimi i kontratës së qirasë ose nënqirasë së bashku me kartelën dhe hartën kadastrale, si dhe prokura në rastet kur aplikuesi nuk është pronar apo bashkëpronar. Po ashtu, duhet të bashkëngjitet mandati i pagesës, e cila mund të kryhet lehtësisht edhe online, në çdo kohë.
Sipas njoftimit të ASHK-së, regjistrimi në kohë i kontratave të qirasë është një hap i rëndësishëm për sigurinë juridike dhe administrimin korrekt të pasurive të paluajtshme.
