Administrata Tatimore u ka vendosur një afat të shkurtër bizneseve për dorëzimin e inventarëve, duke kërkuar që dokumentacioni të depozitohet brenda ditës së nesërme, në një periudhë kur shumë subjekte ende po përballen me pasojat e problemeve teknike në sistemin Self Care.
Në njoftimin zyrtar të shpërndarë subjekteve, Tatimet bëjnë me dije se, në zbatim të ligjit për procedurat tatimore, çdo tatimpagues është i detyruar të paraqesë inventarin analitik të datës 31 dhjetor 2025. Dokumenti duhet të përfshijë të dhëna të detajuara mbi lëndët e para, produktet e gatshme dhe mallrat për rishitje, të pasqyruara sipas njësisë, sasisë, çmimit dhe vlerës.
Inventari duhet të ngarkohet në mënyrë elektronike në sistemin e tatimeve e-Filing, në rubrikën “Çështjet e mia”, me emërtimin Inventari 31.12.2025, brenda datës 31 janar 2026.
Administrata Tatimore paralajmëron se, në rast vonesash, pasaktësish apo mospërputhjesh me të dhënat e fiskalizimit, subjektet mund të klasifikohen me risk dhe të bëhen objekt verifikimi në terren për saktësinë e inventarit të deklaruar.
Vendimi ka shkaktuar reagime nga bizneset, të cilat shprehen se afati është tepër i ngushtë, sidomos pas problemeve të zgjatura me platformën Self Care, e cila për rreth tre javë ka qenë jashtë funksioni deri ditën e djeshme. Sipas tyre, mungesa e aksesit ka pamundësuar rakordimin e faturave dhe verifikimin e të dhënave të nevojshme për inventarët.
Nga ana tjetër, ka edhe subjekte që theksojnë se procesi i inventarizimit mund të kryhet përmes e-Filing, pa qenë domosdoshmërisht i varur nga Self Care.
Problemet teknike kanë ndikuar edhe në përgatitjen e pasqyrave financiare për vitin 2025. Kontabilisti Sotiraq Dhamo ka theksuar më herët se Self Care është mjeti kryesor për rakordime dhe mbetet i domosdoshëm edhe gjatë hartimit të planit financiar vjetor, pasi pa akses në platformë është e vështirë të kryhen verifikimet e nevojshme.
Në të njëjtën linjë, Shoqata e Kontabilistëve dhe Financierëve të Shqipërisë ka kërkuar një plan emergjence dhe shtyrje të afateve për dorëzimin e bilanceve, të cilat aktualisht mbyllen më 31 mars. Sipas shoqatës, përgatitja e tyre nis që në janar dhe kërkon kohë, ndërsa rakordimi i shitjeve dhe konfirmimi i blerjeve mes të dhënave të softuerëve të bizneseve dhe atyre të serverit tatimor është bërë jashtëzakonisht i vështirë.
Në mungesë të një pasqyre të qartë dhe të saktë, shoqata vlerëson se hartimi i pasqyrave financiare rrezikon të kthehet në një proces hamendësimi, duke cenuar parimin themelor të vërtetësisë financiare. /skyweb.al
