Presidenti i Republikës, Bajram Begaj, mori pjesë në takimin e Shoqatës së Biznesit Grek në Shqipëri, organizuar me rastin e “Ditës së Vasilopitës”, ku u diskutua mbi forcimin e bashkëpunimit ekonomik mes dy vendeve.
Gjatë bashkëbisedimit me sipërmarrësit grekë në Tiranë, Kreu i Shtetit u shpreh se marrëdhëniet ekonomike mes Shqipërisë dhe Greqisë po hyjnë në një dinamikë të re, duke theksuar rëndësinë e nxitjes së projekteve të përbashkëta.
“Unë mendoj se ka mundësi për më shumë dhe ka ende hapësira të mëdha për të rritur investimet e ndërsjella”, deklaroi Presidenti Begaj, duke garantuar se “Shqipëria ofron një terren solid për çdo investitor”.
Në këtë kuadër, Presidenti i Republikës renditi disa nga avantazhet që ofron vendi, duke vënë theksin te ekonomia dinamike, monedha e qëndrueshme, sektori bankar i shëndetshëm dhe menaxhimi i kujdesshëm i borxhit publik.
Kreu i Shtetit vlerësoi gjithashtu rolin e kompanive elitare greke që operojnë në sektorët më strategjikë të vendit, duke nënvizuar se prania e tyre në fusha si sistemi bankar, energjia, industria, ndërtimi dhe tregtia përbën një shtyllë të rëndësishme për qëndrueshmërinë ekonomike të Shqipërisë.
Sipas Presidentit Begaj, ky bashkëpunim dëshmon për besimin e ndërsjellë të ndërtuar ndër vite mes dy vendeve.
“Mbështetja e Greqisë mike në procesin tonë të integrimit është dëshmi e një miqësie të sinqertë, e cila po përkthehet në një bashkëpunim gjithnjë e më të ngushtë ekonomik”, u shpreh Presidenti i Republikës.
Ai theksoi se edhe në fushën e tregtisë zhvillimet janë inkurajuese, duke rikujtuar se Greqia vijon të mbetet një nga partnerët kryesorë të Shqipërisë në shkëmbimet e mallrave dhe shërbimeve.
“Kemi një rritje të vazhdueshme të eksporteve reciproke, çka tregon se tregjet tona po bëhen gjithnjë e më plotësuese për njëri-tjetrin”, deklaroi Kreu i Shtetit.
Në përmbyllje, Presidenti i Republikës vlerësoi biznesin grek në Shqipëri edhe për angazhimin aktiv në dialogun publik dhe për kontributin në përmirësimin e kuadrit rregullator, duke e cilësuar këtë si një dëshmi konkrete të partneritetit për progresin e vendit. /skyweb.al
