Tregjet e metaleve të çmuara kanë pësuar një tronditje të fortë këtë të premte, duke i dhënë fund një rritjeje të shpejtë dhe rekord që kishte përfshirë arin dhe metalet e tjera gjatë ditëve të fundit.
Ari, i cili të enjten kishte arritur pothuajse në 5.600 dollarë për onzë, ra brenda pak orësh me rreth 11 për qind, duke zbritur në afërsisht 4.800 dollarë për onzë. Lëvizja shënoi një kthesë të menjëhershme pas një rritjeje shumë të shpejtë, e nxitur nga frika e inflacionit dhe pasiguria globale.
Rënia u përhap edhe te metalet e tjera. Argjendi, që këtë vit kishte shënuar rritje më të fortë se ari, regjistroi rënien më të madhe njëditore në histori, me 26 për qind. Platini humbi rreth 18 për qind të vlerës së tij.
Analistët e tregut e përshkruajnë këtë situatë si një sjellje tipike kur çmimet arrijnë majën. Pas rritjeve ekstreme, investitorët nisin të shesin me shpejtësi, duke sjellë luhatje të forta dhe panik në treg.
Një nga arsyet kryesore të kësaj rënieje ishte lajmi se presidenti amerikan Donald Trump do të emërojë Kevin Warsh në krye të Rezervës Federale. Ky zhvillim forcoi dollarin dhe ndryshoi pritshmëritë e investitorëve për politikën monetare amerikane.
Warsh shihet si një figurë më e rreptë ndaj inflacionit, çka ka ulur frikën për zhvlerësimin e dollarit. Pikërisht këto frikëra kishin shtyrë shumë investitorë të orientoheshin drejt arit gjatë vitit të fundit.
Pasojat u ndjenë edhe në bursë. Aksionet e kompanive minerare ranë ndjeshëm, duke i dhënë fund një periudhe disa mujore rritjeje të fortë.
Në të njëjtën kohë, autoritetet kineze kanë nisur masa për të frenuar spekulimet në tregjet e metaleve. Bursa e Shangait njoftoi pezullimin e disa llogarive tregtare dhe u bëri thirrje investitorëve të tregojnë kujdes, me qëllim ruajtjen e stabilitetit financiar.
Sipas ekspertëve, muaji aktual po konsiderohet si më i paqëndrueshmi në historinë e tregut të metaleve të çmuara. Lëvizjet ekstreme të ditëve të fundit tregojnë se tregu ishte i mbingarkuar dhe se në afat të shkurtër nevojitet më shumë kujdes nga investitorët.
Megjithatë, disa banka dhe fonde investimi vlerësojnë se, pavarësisht rënies së menjëhershme, ari mund të mbetet i rëndësishëm në afat më të gjatë, për shkak të pasigurive gjeopolitike dhe strategjive të diversifikimit të rezervave nga bankat qendrore.
