Agjencia Kombëtare e Punësimit dhe Aftësive njofton se në portalin zyrtar të punësimit, puna.gov.al, janë publikuar rreth 6 mijë vende të lira pune, duke ofruar mundësi konkrete punësimi për qytetarët në mbarë vendin.
Sipas AKPA-së, ofertat përfshijnë një gamë të gjerë pozicionesh në sektorë të ndryshëm dhe janë të hapura për aplikim për të gjitha nivelet arsimore, që nga arsimi bazë, ai profesional, deri te arsimi i lartë.
Pozicionet e shpallura përfshijnë profesione të ndryshme, si ekonomistë, menaxherë, specialistë të komunikimit, zhvillues softuerësh, si dhe inxhinierë mekanikë, civilë dhe të elektroteknologjisë. Po ashtu, ka kërkesë edhe për nëpunës zyre dhe finance, drejtues tregtie dhe specialistë të profileve të ndryshme teknike.
Paralelisht, tregu i punës ofron edhe mundësi për zanatçinj dhe profesione që nuk kërkojnë arsim të lartë, përfshirë punonjës pastrimi, punëtorë ndërtimi, ndihmës kuzhinierë, rrobaqepës, sistemues malli, prodhues këpucësh, si dhe pozicione të tjera në sektorët e shërbimeve dhe prodhimit.
AKPA thekson se portali puna.gov.al garanton një proces aplikimi të thjeshtë, të shpejtë dhe transparent, duke u mundësuar punëkërkuesve të krijojnë profilin personal, të ngarkojnë dokumentet e nevojshme dhe të aplikojnë online për vendet e punës që përputhen me kualifikimet dhe interesat e tyre profesionale.
Përmes këtij portali, qytetarët informohen në kohë reale mbi ofertat më të reja të punës, ndërsa bizneset dhe institucionet përfitojnë nga një bazë e gjerë kandidatësh, çka e bën më efikas procesin e rekrutimit.
Për ata që kanë nevojë për ndihmë gjatë aplikimit ose kërkojnë orientim profesional, Agjencia njofton se mund t’i drejtohen zyrës së punës më të afërt, ku specialistët ofrojnë asistencë dhe këshillim të personalizuar.
Kjo nismë synon të lehtësojë aksesin e qytetarëve në tregun e punës dhe të krijojë një lidhje më efikase mes kërkesave të bizneseve dhe ofertës së fuqisë punëtore. /skyweb.al
