Emigrantët shqiptarë kanë rritur shumën e parave që dërgojnë te familjet e tyre në atdhe.
Sipas Bankës së Shqipërisë, kjo prirje është nxitur nga hyrja e vendit në sistemin SEPA, i cili ka ulur ndjeshëm kostot e transfertave.
Sipas analizës së Bilancit të Pagesave, dërgesat e emigrantëve arritën në 274,3 milionë euro në tremujorin e dytë të këtij viti. Norma vjetore e rritjes së dërgesave u ngadalësua lehtë në 9,4%, nga 10,8% në tremujorin e mëparshëm, por mbetet mbi normën mesatare prej 7,0%.
Si pjesë e PBB-së, dërgesat e emigrantëve u rritën lehtë në 4,3%, nga 4,2% në tremujorin e parë, duke vazhduar të mbështesin rritjen e të ardhurave të disponueshme të familjeve dhe konsumin privat në vend.
“Normat vjetore të rritjes së dërgesave janë përshpejtuar që nga tremujori i katërt, periudhë që përkon me fillimin e operacioneve SEPA në Shqipëri. Ky zhvillim sugjeron se kostot më të ulëta dhe efikasiteti më i lartë i transfertave ndërkufitare në euro mund të kenë kontribuar në rritjen e flukseve hyrëse të dërgesave,” thuhet në analizën e Bankës së Shqipërisë.
Që nga tetori i vitit të kaluar, kur Shqipëria iu bashkua sistemit SEPA, pagesat hyrëse nga emigrantët (dërgesat) kanë një kosto maksimale prej 3 eurosh. Ulja e ndjeshme e kostove ka bërë që shumë emigrantë të zgjedhin kanalet zyrtare dhe transfertat bankare për të dërguar para te të afërmit e tyre, në vend që të dërgojnë para në dorë (cash). /Euronews.al
