Viti 2025 ka shënuar një rritje të ndjeshme të interesit për licencim në tregtimin e energjisë elektrike. Sipas të dhënave nga Enti Rregullator i Energjisë, gjatë vitit që lamë pas janë dhënë 14 licenca të reja për ushtrimin e aktivitetit të tregtimit të energjisë, një shifër dukshëm më e lartë krahasuar me vitin 2024, kur u miratuan vetëm 3 të tilla.
Ndërkohë, në 5-vjeçarin fundit, numri më i lartë është shënuar në 2022-in, kur ERE licencoi 16 kompani në ushtrimin e këtij aktiviteti. Rritja e interesit në atë kohë erdhi kur tregjet e energjisë elektrike ishin të paqëndrueshme, ndërkohë që Koroprata Elektorenergjetike Shqiptare, që menaxhonte shit – blerjet kryente procedura të shpeshta në këtë drejtim.
Ndërkohë, shifrat e vitit 2025 vijnë në një kontekst të ndryshëm nga ai i viteve të krizës energjetike, teksa tregu vendas ka pësuar zgjerim të numrit të prodhuesve, me investime të reja në energjinë diellore.
Sipas legjislacionit në fuqi, tregtimi i energjisë elektrike përfshin blerjen e energjisë nga një person juridik me qëllim rishitjen e saj, brenda ose jashtë territorit ku ushtron aktivitetin.
Në total, numri i subjekteve të licencuara për këtë veprimtari, sipas të dhënave zyrtare nga Enti Rregullator i Energjisë ka arritur në 130. /tvscan.al
