Elisa Spiropali ka reaguar me ironi në Kuvend lidhur me largimin e saj nga detyra e ministres së Jashtme, duke lënë të kuptohet se paralajmërimi i bërë më herët nga Sali Berisha për këtë ndryshim rezultoi i saktë.
Në një koment ironik edhe ndaj kryeministrit Edi Rama që firmosi shkarkimin, Spiropali tha se e vetmja gjë që e habiti ishte fakti që largimin e saj e kishte parashikuar pikërisht lideri i opozitës.
Debati u zhvillua gjatë një replike me deputetin demokrat Belind Këlliçi, i cili u rikthye në Kuvend pas rreth tre muajsh mungesë. Në fjalën e tij, Këlliçi përmendi largimin e Spiropalit nga posti i ministres së Jashtme, duke theksuar se ajo ishte ndër të paktat deputete në grupin parlamentar të Partisë Socialiste që flasin anglisht.
Spiropali iu përgjigj me tone ironike, duke theksuar se gjuha që flet më mirë është shqipja dhe se gjithmonë ka folur troç për Shqipërinë.
“Unë nuk flas vetëm anglisht, flas edhe gjuhë tjetër të huaj, por më mirë se shqipen s’flas asnjë gjuhë. Flas shqip, flas troç, kam folur gjithmonë si duhet për dhe me Shqipërinë,” tha ajo nga foltorja e Kuvendit.
Spiropali, tashmë vetëm deputete, shtoi se çdo detyrë në Kuvendin e Shqipërisë është një nder, duke u shprehur se është e qetë për rolin e saj aktual. Megjithatë, ajo nuk e kurseu ironinë për mënyrën se si u paralajmërua largimi i saj nga posti ministror.
“Çdo detyrë këtu në Kuvendin e Shqipërisë është nder i madh. Jam e qartë, jam e qetë. E vetmja gjë për të cilën më vjen keq është që largimin e paralajmëroi Sali Berisha dhe jo ndonjë tjetër. Vetëm për këtë jam e habitur, që i doli fjala, për asgjë tjetër,” deklaroi Spiropali. /skyweb.al
