Qeveria ka miratuar rregullat e reja për mënyrën se si do të trajtohen kreditë e marra me garanci shtetërore që nuk janë shlyer nga huamarrësit. Vendimi i Këshillit të Ministrave përcakton procedurat për rikuperimin e detyrimeve dhe administrimin e pasurive të debitorëve që kanë mbetur pa u paguar.
Sipas vendimit, procesi do të menaxhohet nga Agjencia e Menaxhimit të Garancive dhe Kredive të Pakthyera. Procedurat nisin në momentin kur Ministria e Financave paguan garancinë shtetërore në vend të huamarrësit ndaj bankës ose kur konstatohet një detyrim i pashlyer ndaj shtetit.
Në fazën e parë, Agjencia i dërgon debitorit një njoftim për shlyerjen e borxhit dhe kryen verifikimin e gjendjes së tij financiare. Në këtë proces kontrollohen të ardhurat dhe mundësia reale për të paguar detyrimin.
Në rast se rezulton se huamarrësi ka kapacitet pagese, Agjencia mund të kërkojë bllokimin e llogarive bankare dhe sekuestrimin e shumave për të rikuperuar detyrimin që është shlyer nga shteti në emër të tij.
Nëse borxhi nuk shlyhet, procedura kalon në gjykatë dhe më pas ndiqet me përmbarim deri në rikuperimin përfundimtar të detyrimit ndaj Ministrisë së Financave. Të gjitha fondet e rikuperuara derdhen në llogarinë e thesarit të shtetit.
Vendimi përcakton gjithashtu mënyrën e administrimit të garancive sovrane. Bankat e nivelit të dytë do të raportojnë çdo muaj për gjendjen e kredive me garanci shtetërore, ndërsa Agjencia verifikon çdo kërkesë për pagesë përpara se ajo të miratohet nga Ministria e Financave.
Në rast se debitorët vazhdojnë të mos shlyejnë detyrimet, pasuritë e vendosura si garanci, por edhe pasuri të tjera të tyre, mund të kalojnë në administrim të Agjencisë përmes procedurave përmbarimore. Këto pasuri më pas mund të shiten përmes ankandit publik sipas rregullave për shitjen e pronës shtetërore, ndërsa të ardhurat kalojnë në buxhetin e shtetit për të mbuluar detyrimet e papaguara.
Vendimi i ri shfuqizon gjithashtu një akt të vitit 2009 që rregullonte trajtimin e kredive të transferuara nga bankat shtetërore te Agjencia e Trajtimit të Kredive. Rregullat e reja synojnë të krijojnë një mekanizëm më të qartë për administrimin dhe rikuperimin e kredive të garantuara nga shteti. /skyweb.al
