Shoqata e Siguruesve të Shqipërisë ka shprehur shqetësimin për numrin e lartë të aksidenteve rrugore në vend, duke bërë thirrje për më shumë kujdes nga drejtuesit e automjeteve dhe përdoruesit e rrugës.
Sipas shoqatës, në Shqipëri regjistrohen mesatarisht rreth 11 aksidente në ditë, një shifër që sipas saj tregon nevojën për rritjen e ndërgjegjësimit dhe respektimin e rregullave të qarkullimit rrugor.
Përmes një fushate sensibilizuese të publikuar në rrjetet sociale, Shoqata e Siguruesve u ka bërë apel qytetarëve të tregojnë më shumë përgjegjësi në rrugë, duke theksuar se aksidentet çdo ditë shkaktojnë viktima dhe të plagosur.
Mesazhet e shpërndara në kuadër të kësaj fushate u bëjnë thirrje drejtuesve të mjeteve të respektojnë kufijtë e shpejtësisë, të shmangin përdorimin e telefonit gjatë drejtimit të automjetit dhe të tregojnë vëmendje ndaj përdoruesve të tjerë të rrugës.
Shoqata thekson gjithashtu rëndësinë e respektimit të semaforëve dhe sinjalistikës rrugore, si dhe kujdesin e shtuar në kryqëzime. Një tjetër element i theksuar në mesazhet sensibilizuese është edhe vëmendja ndaj mjeteve alternative të lëvizjes, si biçikletat dhe monopatinat.
Sipas shoqatës, respektimi i rregullave të qarkullimit dhe sjellja e përgjegjshme në rrugë janë faktorët kryesorë për uljen e numrit të aksidenteve dhe rritjen e sigurisë për të gjithë përdoruesit e rrugës. /sigurime.online
