Në një kohë kur teknologjia po përparon me ritme të shpejta, rritet paralelisht edhe rreziku nga përdorimi i saj për qëllime destabilizuese. Në Tiranë, më 9 qershor, u zhvillua një konferencë me pjesëmarrjen e zyrtarëve të lartë, ekspertëve të sigurisë dhe vendimmarrësve vendas e ndërkombëtarë për të adresuar rrezikun që sjell keqpërdorimi i inteligjencës artificiale nga aktorë armiqësorë.
Konferenca me titull “Kundër AI-së Koercitive: Një Strategji kundër Agresionit Teknologjik nga Shtetet Armiqësore”, e organizuar nga Qendra Amerikane për Luftimin e Ekstremizmit dhe Terrorizmit (ACCET), u mbajt në hotelin MAK Albania në Tiranë.
Në sesionin hapës, fjalimet e përfaqësuesve të institucioneve vendore dhe ndërkombëtare theksuan domosdoshmërinë e një reagimi të koordinuar përballë kërcënimeve të reja. Drejtori ekzekutiv i ACCET, Arianit Shehu, znj. Lejdi Dervishi nga Ministria e Brendshme, Dr. Dwaine Lee nga ACCET dhe z. Edward Anderson nga OSBE nënvizuan se teknologjitë e reja, në veçanti AI, po përdoren gjithnjë e më shumë për të përhapur dezinformim, për të ndikuar proceset demokratike dhe për të rritur rrezikun e sulmeve hibride ndaj institucioneve shtetërore.
Në qendër të vëmendjes ishte z. Scott Bates, ish-Këshilltar i Lartë i Komitetit për Sigurinë e Brendshme në Dhomën e Përfaqësuesve të SHBA, i cili ofroi një analizë të thelluar mbi përdorimin e AI-së si armë hibride për të ndikuar në sigurinë kombëtare dhe politikat globale. Ai theksoi se, ndërsa AI mund të jetë një mjet i fuqishëm për ruajtjen e rendit publik, ajo gjithashtu mund të kthehet në një instrument të fuqishëm për propagandë, radikalizim dhe ndërhyrje të huaja.
Në vijim, Edward Anderson nga OSBE prezantoi rreziqet që burojnë nga teknologjitë e pamenaxhuara, ndërsa Gledis Nano, ish-Drejtor i Përgjithshëm i Policisë së Shtetit, foli për format konkrete të ndërhyrjeve keqdashëse të AI-së në Ballkan dhe më gjerë, përfshirë dezinformimin në kohë krizash dhe manipulimin e opinionit publik.
Në sesionin përmbyllës, pjesëmarrësit ndanë rekomandime konkrete për ndërtimin e një strategjie të përbashkët, forcimin e bashkëpunimit ndërinstitucional dhe rritjen e qëndrueshmërisë institucionale përballë kërcënimeve hibride.
Kjo konferencë përbën një hap të rëndësishëm në përpjekjet e Shqipërisë për të harmonizuar politikat e saj të sigurisë me Bashkimin Evropian dhe SHBA, duke promovuar një model të bazuar në rregulla për menaxhimin e teknologjive të reja dhe mbrojtjen nga ndërhyrjet destabilizuese nga jashtë.
