Aeroporti i Malpensës në Itali është emëruar zyrtarisht “Silvio Berlusconi”, në nderim të ish-kryeministrit italian dhe themeluesit të Mediaset.
Ceremonia e inaugurimit të emrit të ri u zhvillua të premten në mëngjes, në aeroportin që ndodhet në provincën e Vareses, në prani të familjarëve të Berlusconit dhe figurave të larta politike e institucionale.
Në ceremoni mori pjesë vajza e tij, Marina Berlusconi, e cila u shpreh e emocionuar dhe krenare që aeroporti, që pret çdo ditë mijëra udhëtarë nga e gjithë bota, do të mbajë emrin e të atit.
Marina e përshkroi Berlusconin si një njeri që “gjithmonë kërkonte dialogun me të gjithë”.
Në emër të familjes foli edhe vëllai i tij, Paolo Berlusconi, i cili e cilësoi aeroportin si një portë drejt Evropës dhe botës.
Sipas tij, vendosja e emrit të Silvio Berlusconit është një mënyrë për të ruajtur kujtimin dhe trashëgiminë e tij.
“Sot Silvio nuk është më, por është më i gjallë se kurrë”, u shpreh Paolo Berlusconi, duke iu referuar rolit të ish-kryeministrit në biznes, sport, media dhe politikë.
Në ceremoninë zyrtare morën pjesë edhe presidenti i Senatit, Ignazio La Russa, presidenti i Lombardisë, Attilio Fontana, si dhe zëvendëskryeministri Matteo Salvini.
Salvini e cilësoi Berlusconin një nga sipërmarrësit më të mëdhenj në historinë politike italiane.
Ai argumentoi se emërtimi i aeroportit nuk përbën një akt partiak, por një njohje të rolit të Berlusconit në historinë e vendit.
Megjithatë, vendimi është shoqëruar edhe me polemika politike.
Kryebashkiaku i Milanos, Giuseppe Sala, nuk mori pjesë në ceremoni, pasi kishte kundërshtuar vendimin për emërtimin e aeroportit.
Sala deklaroi se prania e tij në ceremoni do të binte ndesh me qëndrimin që kishte mbajtur.
Salvini shprehu keqardhje për mungesën e kryebashkiakut të Milanos.
Reagim pati edhe nga Marta Fascina, ish-partnerja e Berlusconit dhe deputete e Forza Italia-s.
Përmes një postimi në Instagram, ajo shkroi se sa herë një udhëtar të niset nga aeroporti “Silvio Berlusconi” dhe të ngrihet në qiell, ish-kryeministri do të jetë aty për ta shoqëruar.
Fascina iu drejtua edhe kritikëve të Berlusconit, duke deklaruar se ata do të vazhdojnë të shohin madhështinë e tij.
