Evropa rrezikon të përballet me mungesa serioze të energjisë në javët në vijim, nëse situata në Ngushticën e Hormuzit nuk normalizohet dhe rrjedha e naftës nuk rikthehet në nivele të zakonshme.
Paralajmërimi është dhënë nga drejtues të industrisë energjetike, të cilët theksojnë se ndërprerjet në këtë korridor jetik po ndikojnë drejtpërdrejt në furnizimin global me naftë dhe gaz. Kompanitë e mëdha të sektorit po bashkëpunojnë me qeveritë për të menaxhuar pasojat e krizës, e cila ka nisur të reflektohet fillimisht në tregjet aziatike.
Sipas tyre, presioni mbi furnizimet është zhvendosur gradualisht nga Azia Jugore drejt rajoneve të tjera, duke përfshirë Azinë Lindore dhe tashmë edhe Europën, ndërsa afron muaji prill.
Ndërkohë, tregjet e naftës kanë shfaqur luhatje të forta gjatë ditëve të fundit. Pas rritjes në nivele të larta në fillim të javës, çmimi i naftës ka shënuar një rënie të lehtë, i ndikuar nga sinjale për përpjekje diplomatike mes SHBA dhe Iranit.
Megjithatë, ekspertët paralajmërojnë se pa një rikthim të plotë të furnizimeve nga Gjiri Persik, situata mund të përkeqësohet shpejt. Tregjet e karburanteve, përfshirë atë të karburantit për avionë, janë ndër më të prekurat, me çmime që janë rritur ndjeshëm që nga nisja e konfliktit.
Edhe përfaqësues të qeverive europiane kanë ngritur shqetësime për një skenar mungesash të mundshme në fund të pranverës, nëse tensionet vazhdojnë dhe rrugët kryesore të furnizimit mbeten të kufizuara. /skyweb.al
