Këshilli i Ministrave ka miratuar ndërtimin e dy centraleve fotovoltaike në qarkun e Korçës, me kapacitet total të instaluar prej 152 megavat, të cilat do të ndërtohen nga kompani shqiptare dhe nuk janë objekt koncesioni.
Projekti i parë parashikon ndërtimin e një parku fotovoltaik me kapacitet 102 MW në njësinë administrative Mbreshtan, Bashkia Kolonjë, nga shoqëria “TEKNO FIRE”, sh.p.k., në pronësi të biznesmenit Alban Çejku. Sipas vendimit, centrali do të ndërtohet dhe do të vihet në operim brenda 36 muajve nga hyrja në fuqi e vendimit, ndërsa afati i shfrytëzimit është përcaktuar 49 vjet.
Shoqëria ka detyrimin të raportojë çdo tre muaj mbi ecurinë e punimeve pranë Ministrisë së Infrastrukturës dhe Energjisë dhe Agjencisë Kombëtare të Burimeve Natyrore, si dhe të dorëzojë sigurimin e kontratës në masën jo më pak se 5% të vlerës së investimit. Po ashtu, kompania duhet të japë në formë royalty 2% të prodhimit vjetor të energjisë elektrike ose vlerën përkatëse në buxhetin e shtetit, si dhe të respektojë kushtet mjedisore dhe ligjore në fuqi.
Projekti i dytë parashikon ndërtimin e një centrali fotovoltaik me kapacitet 50 MW në afërsi të fshatit Vërnik, njësia administrative Qendër Bilisht, Bashkia Devoll, nga shoqëria “KRONOS KONSTRUKSION”, sh.p.k., në pronësi të Vasil Jovanit. Edhe ky projekt do të realizohet brenda 36 muajve dhe do të ketë afat shfrytëzimi 49 vjet.
Edhe për këtë investim, kompania ka detyrime të njëjta për raportim periodik, respektim të lejeve mjedisore dhe dorëzim të sigurimit të kontratës, si dhe detyrimin për të dhënë 2% të prodhimit të energjisë në formë royalty për shtetin ose ekuivalentin financiar.
Në të dyja rastet, Ministria e Infrastrukturës dhe Energjisë dhe Agjencia Kombëtare e Burimeve Natyrore do të ushtrojnë mbikëqyrje të vazhdueshme çdo tre muaj për ecurinë e punimeve, cilësinë dhe përputhjen me projektin e miratuar. Vendimet kanë hyrë në fuqi menjëherë dhe do të publikohen në Fletoren Zyrtare.
