Deputeti i Partisë Socialiste, Erion Braçe, ka shpallur papritur kandidaturën për kryetar të Bashkisë së Tiranës, duke surprizuar jo vetëm strukturat e partisë, por edhe vetë drejtuesit e pranishëm në mbledhje.
Deklarata u bë gjatë mbledhjes së Asamblesë së PS në Njësinë 5, ku merrnin pjesë edhe Taulant Balla dhe Fatmir Xhafaj.
Në fjalën e tij, Braçe theksoi se situata aktuale në organizimin e socialistëve nuk mund të vazhdojë në të njëjtën mënyrë dhe kërkon një qasje ndryshe.
“Kjo situatë nuk mund të jetë më e tillë. Nuk gjejnë zgjidhje problemet që kanë socialistët dhe ka nevojë për një organizim ndryshe. Ndaj në këtë situatë unë do dal të kërkoj mbështetjen e socialistëve jo vetëm të Njësisë 5, por në gjithë Tiranën dhe nëse nuk do të jem kandidat zyrtar i PS, do të shpall kandidaturën si kandidat i pavarur për kryetar bashkie në Tiranë”, u shpreh ai.
Deklarata e tij ka shkaktuar habi në sallë, duke lënë pa reagim të menjëhershëm edhe drejtuesit socialistë të pranishëm.
Kjo dalje vjen në një moment kur, sipas vlerësimeve të brendshme, një pjesë e anëtarëve të Asamblesë së PS në Tiranë nuk janë të kënaqur me mënyrën se si janë zhvilluar politikat në nivel lokal në kryeqytet.
Megjithatë, ndryshe nga sa mund të interpretohet, burime të Skyweb.al bëjnë me dije se kjo lëvizje nuk është rezultat i një koordinimi me strukturat drejtuese të partisë, por një vendim spontan i Braçes. Sipas të njëjtave burime, kandidimi i tij shihet me shumë pak gjasa për t’u mbështetur nga kupola e PS, duke pasur parasysh edhe vlerësimet për performancën e tij në detyra të mëparshme shtetërore.
Ky zhvillim vjen në një kohë kur edhe kandidatura e Ogerta Manastirliu, e shpallur nga Rama më herët si emri për Tiranën mundshëm për Tiranën pas largimit nga posti i ministres së Shëndetësisë, nuk shihet më si e sigurt.
Në të njëjtën kohë, brenda Partisë Socialiste janë vënë re lëvizje dhe qëndrime kritike nga figura të ndryshme.
Elisa Spiropali madje ka marrë përballë Taulant Ballën dhe Edi Ramën duke i sfiduar herë njerin dhe herë tjetrin publikisht.
Braçe ka qenë shpesh një zë kritik brenda socialistëve, duke mbajtur qëndrime kundër linjës zyrtare edhe pse ka pasur mundësi të propozojë ndryshime konkrete ligjore, si në rastin e propozimeve për uljen ose heqjen e akcizës së naftës në kushtet e krizës.
Lëvizja e tij për Tiranën shihet në këtë kontekst si një tjetër sinjal i pakënaqësive të brendshme, ndërsa mbetet për t’u parë se si do të reagojë Edi Rama dhe nëse kjo kandidaturë do të marrë ndonjë formë zyrtare apo do të mbetet një iniciativë individuale.
Deri atëhere, me Braçen të cilit në PS nuk i japin shanse për Tiranën dhe Manastirliun që është ende “pending”, qartësimi i emrit për Tiranën i mbetet javëve në vijim, pasi edhe Rama të jetë i qartë vetë se çfarë do të bëjë me zërat që shpesh i lë të flasin për të treguar që ka demokraci në PS… ./skyweb.al
